شال زامران ، نوشکی ءُ ھُزدار ءَ بیتگیں اُرشانی زمہ واریاں منّ ایں- بی ایل اے

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں شال، زامران، نوشکی ءُ ھُزدار ءَ ھپت جتاجتائیں اُرشاں زورگریں پاکستانی پوج ءُ دُژمن ءِ وتگڑیں آجوئی شاتکامی مراگش نشانگ کتگ اَنت-

جارکش ءَ گْوشتگ بی ایل اے ءِ سرمچاراں گوستگیں شپ ءَ شال شھر ءَ نواب اکبر بگٹی اسٹیڈیم سر ءَ ھما وھد ءَ گرنیڈ لانچر ءَ چہ بازیں گولھے آس داتگ وھدے زورگریں پاکستانی پوج ءِ سروکی ءَ وتگڑیں چاردہ اگست مراگش برجاہ بیتگ زورگریں پوج ءُ بُتیں سرکار ءَ کروڑانی کلدار ھرچ کتگ اے مراگش برجم داشتگ-

جارکش ءَ گْوشتگ مروچی یک اُرشے ءَ بلوچ لبریشن آرمی ءِ سرمچاراں شال ءَ ریل اسٹیشن ءِ نزیک ءَ زورگریں پاکستانی پوج ءِ سروکی ءَ برجاھیں وتگڑیں آجوئی شاتکامی مراگش ءِ سر ءَ اُرش کتگ-

جارکش ءَ گْوشتگ ھمے وڑ بی ایل اے ءِ سرمچاراں شال سیکریٹریٹ سر ءَ گرنیڈ لانچر ءِ چہ چار گولہ آس داتگ ءُ نشانگ کتگ-

جارکش ءَ گْوشتگ دگہ اُرشے ءَ بی ایل اے ءِ سرمچاراں شال ءِ دمگ اختر آباد ءَ زورگریں پاکستانی پوج ءِ پانگس دستی بمب اُرش ءَ نشانگ کتگ چریشی ءَ کم چہ کم دو کارمند ٹپی بیتگ اَنت-

بلوچ لبریشن آرمی ءَ گوشتگ مئے سرمچاراں مروچی سھب ءَ زامران ءَ صابونی ءِ ھند سر ءَ زورگریں پاکستانی پوج ءِ یک پوسٹے دو نیمگاں چہ اُرش کتگ-

جارکش ءَ گْوشتگ سرمچاراں سنائپر ءَ چہ یک دُژمنیں کارمندے ھما کشتگ ءُ اُرش بندات کتگ، دُژمنیں پوج ءِ سر ءَ مزنیں سلاھاں چہ اُرش کتگ دگہ سے کارمند ٹپی کتگ اَنت وھدے کہ زورگریں پوج ءِ جتگیں سرویلنس کیمرہ ھم سرمچاراں اُرش ءَ تباہ کتگ-

جارکش ءَ گْوشتگ کہ سرمچاراں مروچی سھب ءَ ھُزدار ءَ زورگریں پوج ءِ جوڑ کتگیں وتگڑیں ڈیتھ اسکواڈ کارمند یونس محمد شھی ءِ نندانکجاہ دستی بمب اُرش ءِ نشانگ کتگ-

بلوچ لبریشن آرمی ءَ گوشتگ مئے سرمچاراں دگہ یک اُرشے زورآباد ھند سر ءَ زورگریں پاکستانی پوج کارمند ءَ دستی بمب اُرش ءَ نشانگ کتگ اَنت چریشی ءَ کم چہ کم دو کارمند ٹپی بیتگ اَنت-

جارکش ءَ گْوشتگ کہ بلوچ لبریشن آرمی اے اُرشانی زمہ واری ءَ منّ اِیت- زورگریں پاکستانی پوج ءِ بلوچستان ءَ چہ سرجمی ءَ دراھگ ءَ تاں مئے اُرش برجاہ بنت-