زمین منی بانک ءَ سمبھین
نبشتہ کار: نوید بلوچ
دی بلوچستان پوسٹ
زمین!منی بانک ءَ پہ دابے سمبھین،ھما بانک کہ پہ تو شپ داں روچ جیڑگ ءَ اِنت،ھما دُردانگ کہ وتی شپانی پاس ئِے تئی نام ءَ ندر کُتگ ءُ مُدام ھمے جیڑ اِیت کہ زمین کدی من ءَ وتی امبازاں زُورایت ءُ من وتی مھرئے واھگانی پد ءَ پہ زمین ءَ وتی جان ءَ گوں ھشیمیں جزبگاں کُربان کناں-
منی بانک! اے راستیں ھبر ءِ کہ تو من ءَ دوست بَہ ئے بلے اِیشی ءِ توک ءَ دگہ ھم راستی ءِ پدّر اِنت کہ من ءَ زمین ءِ زیبائیں بنگانی ملاراں گِپتگ کہ ترا دوست داراں،ھو تو من ءَ دوست ئے بلے اے ھبر ءَ ھم سدّک بو کہ من ءَ زمین دوستی ءَ تئی دوستی ءِ سِکین داتگ ءُ من بِھ اے ھبر ءَ وش نہ باں کہ تو دِگر ءِ ئے بانور بِہ بَہ ئے اے ھبر ھم من ءَ شات نہ بیت کہ من وتا تئی سالونک بِہ کناں پرچا کہ من زمین ءِ مِھرانی ملپد ءَ انچیں کشکے گِپتگ کہ من پہ ترا واتر بوت نہ کناں-
بانُک! اے وھد ءَ کہ تو من ءَ دست بڈّ ءَ جتگ ءُ راہ دیگ ءَ ئِے منی دل ءَ باز واھگ ھَست ات کہ من بِہ جلّ آں ءُ ترا امبازاں بِہ زیراں،بلے منی سسّا من ءَ ھمے پھم ءَ دیگ ءَ اِنت کہ دگہ بانور ءِ تئی وداریگ اِنت کہ کدی تو کائے من ءَ امبازاں زور ئے ءُ من ترا وتی وشبوئیں زُلپانی تہ ءَ پہ دائمی واپین آں،من ترا اے ھبر ءَ ھم دلجم کن آں کہ اگاں آ رزا بوت گُڑا من ترا یل نَہ کن آں پرچا کہ اَبید تئی ءَ من مُلور بَیاں داں وھدے آ رزا نَہ بیت گُڑا من جُنزان آں پہ آئی ءَ-
بلے بانک! جُنزگ ءَ چہ پیسر من ترا یکّے ءِ باھوٹ کن آں ءُ رھادگ بَاں،من جیڑگ ءَ آں کہ ترا کَے ئے باھوٹ بِہ کن آں کہ منی روگ ءَ رند آ ترا منی آیگے سکین ءَ بِہ دنت،من ترا ھما پُل ءُ گُلاب ءِ باھوٹ کن آں کہ آ دائم ترا ھمے گْوش اِیت کہ تئی مھرانی سالونک نہ شُتگ ھمد ءَ ھوار اِنت گوں ترا-
بانک! تو دل ءَ بِھ مجیڑ کہ من اِد ءَ نَیاں من ھر دمان ءَ تئی دل ئے توک ءَ یاں،اے ھبر وَ من ءَ شات نَہ بیت کہ بُگْش آں کہ من چہ ترا دور آں پرچا کہ من ترا ھما ارواھے میار کُتگ کہ داں من جُنزان آں آ ترا ھمے گْشان اِنت کہ تئی دل ءِ تاھیر پہ تئی وژدلیں باندات ءَ رھادگ اِنت ءُ الّم واتر بیت-
بلے زمین! منی بانک ءَ چہ وتا دور مہ کن کہ سکّ ملور بیت ءُ ارس گْوار اِیت، تو منی بانک ءَ گوں بانوری پرداچاں سمبھین ءُ مدام گوں آئی ءَ لیب بِہ کن ءُ آرا ھمے سسّا ءَ بِہ دئے کہ من تئی باندات ءِ اُمیت آں ءُ پہ ترا جُنزاناں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔