وتگڑیں گیرت
نبشتہ کار: زھیر بلوچ
دی بلوچستان پوسٹ
بلوچستان ءِ تہ ءَ ھمُک روچ وڑے ناں وڑے ءَ بدیں ھالے مئے دیم ءَ کئیت۔ھمُک روچ کسے ءِ زورآنسری آوار جنی ءُ ژانگولیں جون ءِ دست کپگ، کسے ءِ دگے ویلے ءَ بیران بوگ، کسے ءِ شومگ ءِ نادُراھی ءَ بیران بوگ یا کسے ءِ وتگڑیں نَنگ ءُ ناموس ءِ نام ءِ سرا کُشگ ءُ دور دیگ۔ اگاں ما راستی ءَ بچاریں اے دُرسیں جیڑا وڑے ناں وڑے ءَ یکے دومی ءَ گوں بندوک انت بزان اے دُرسیں جیڑا کہ ھمُک روچ بوگ ءَ انت ایشانی پُشدر بس بلوچ راج ءِ ایردستی اِنت۔ اے ھمے ایردستی ءِ بدیں روچانی برورد انت کہ بلوچستان ءِ پُسگاں ایر بران انت۔
زورگریں اِستان ءَ بلوچ ڈیھ ءِ ایردست کنگ ءَ پَد بلوچ راج ءِ زند ءِ ھمُک سرپ ءَ پروشت ءُ پروش ءِ آماچ کتگ بلوچ ءِ ھمُک روچی زندمان انچو لگتمال کتگ کہ بلوچ وتی جند ءَ گوں ھسد ءُ کینگ بدار ایت۔ زورگریں استان ءَ بلوچ ءِ دودمان لپاشتگ انت دانکہ بلوچ وتی مادنیں کِشک ءَ گِسر بہ کپ ایت ءُ وتی بُنکی پجار ءُ راجدپتر ءَ گار بہ کنت۔ چوناھیا بلوچستان ءِ سرا نبشتہ کنگ ءَ بُنگپ سک باز اِنت بلے مرچی مئے بُنگپ بلوچستان ءِ تہ ءَ وتگڑیں گیرت ءِ نام ءِ سرا کُشت ءُ کوش انت۔ مرچی باندا ما گندگ ءَ ایں کہ اے روشت بلوچستان ءِ کُنڈ، کُنڈ ءَ گیش بُوان اِنت۔ ھمُک روچ کسانیں جنکوے یا بچکے گیرت ءِ نام ءِ سرا کُشگ بوگ ءَ اِنت۔ پد ءَ مردم وھدے ایشانی کوش ءِ سبب ءَ سرپد بیت داں ھبکہ بیت کہ کسانیں جیڑھے ءِ سرا اے مردم کُشگ بوتگ اَنت۔
بلوچ راجدپتر ءِ تہ ءَ زالبول ءِ مزنیں ارزشتے ھست بلوچ زالبول ھمُک پِڑا گوں مردیناں ھمگام بوتگ انت۔ بلے مرچیگیں نوآبادیاتی ربیت ءَ بلوچ زالبول گیشتر لگتمال کتگ انت چیاکہ نوک آبادکار اے گپ ءَ شر سرپد انت کہ ھمُک راج ءِ زالبول آئی ءِ دیمروی ءِ بُن ھشت انت زالبول راجی جُنزانی تہ ءَ مزنیں کِردانی واھُند انت۔ پمیشکا زورگریں استان ءَ بلوچ ءِ تَب (نفسیات) مٹ کنگ ءِ جھد کتگ ءُ کنگ ءَ انت۔ زورگریں استان ءَ بلوچ مجگی نادُراہ جوڑ کتگ پمیشکا بلوچ کسانیں گپے ءَ جزباتی بیت ءُ کُشت ءُ کوش ءَ پاد کئیت۔ ھمے آس ءَ بلوچ زالبول گیشتر سُچگ انت۔ زمانگ ماہ ءِ سرا سر انت بلے بلوچستان ءَ یک جنکوے ھمے واستا کُشگ بیت کہ آئی ءِ اکسے چاگردی رسانکدر ءَ شِنگ بیت۔ یا آ کسے ءَ گوں مھِر کنت۔ پد ءَ ھمے کُشوک اے گپ ءَ ھم پٹ ءُ پول نکن انت کہ اے اکس چون شنگ بوتگ بلکیں ایشی ءِ پُشت ءَ دگے جیڑھے بیت یا ردی ءَ چے شنگ بوتگ۔ ناں۔۔۔۔ آ بس تیر ءُ تُپنگ بنت مردم ءَ کُش انت کہ مئے گیرت شُت۔ آیا اے کسانیں گپ ءِ سرا یک انسانے ءِ کُشگ ءِ ھک ترا کئے ءَ داتگ؟ آیا ھمے جنکو ءِ کُشگ ءَ تئی اِزت ءُ گیرت آزمان ءَ روت سر بیت؟ مھِر کنگ ءِ ھک ھرکس ءَ ھست جنکے بیت شر یا بچکے بیت شر۔ اے برات یا پِت گیرت ءِ نام ءِ سرا وتی چُکاں کُش انت ھمے وت دُراھیں روچ جھد ءَ بنت کہ دگرے ءِ مات ءُ گھارے منی سنگت بہ بیت۔ اے وھد ءَ ناں ایشاں وتی وتگڑیں گیرت دیم ءَ کئیت ناں اے گپ ءَ جیڑاں کہ اگاں مارا مھر کنگ ءِ ھک ھست گُڑا مئے چُک ءُ گوھاراں پرچا نیست؟ منی دل ءَ اے وتگڑیں گیرت ءِ نام ءِ سرا کُشت ءُ کوش بلوچ چُکچینی ءِ بھر انت کہ مرچی زورگریں استان ءَ بلوچ چاگرد ءِ توک ءَ رواج داتگ۔ بژن انت مئے سوچ ءُ پِکر کجا اتکگ سر اِنت مئے بلوچیت انچو نزور بوتگ کہ مئے مات ءُ گھارے ءِ گُشان کمو کپ ایت گُڑا بزان مئے گیرت شُتگ۔
کمو بہ جیڑ اِت کہ ما چے کنگ ءَ ایں؟ وتی چکانی ھک ءُ اُگبالاں بزان ئے۔وتی چکانی گپاں گوش بدار اِت۔کسانیں گپے ءِ سرا انچو پہ دیم جزباتی مہ بہ ئے بلکیں جیڑاھاں گیش ءُ گیوار بکن اِت بہ نِند اِت وتی چُک ءُ گوھارانی گپاں گوش بدار اِت۔ دانکہ آھاں ھم زندگی ءِ موہ بہ رس ایت۔ زورگریں استان ءِ دور داتگیں دام ءِ چمگ ءَ مہ کپ اِت بلکیں وتی راہ ءَ وت راست بکن اِت وتی چاگرد ءَ برابری ءِ نگاہ ءَ بچار اِت۔ انچو کہ مارا زندگی ءِ ھک ھست ھمے وڑا مئے مات ءُ گوھاراں ھم زندگی ءِ ھک ھست۔یک اکسے ءِ شنگ بوگ ءَ یا مھر کنگ ءَ مئے گیرت بایدیں نزور مہ تر ایت۔ چو مہ بیت کہ باندا روچ مارا وتئی دست سرا بہ بنت ءُ پہ ماں ھچ پشت مہ کپ ایت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔