شئر: بالاچ ءِ میّت ءِ آتراپ ءَ نشتگیں مات ءُ گْوھارانی نام ءَ
شائر: کادر ھسرت
دی بلوچستان پوسٹ
گُلزمین ءِ پریات
اے دردناکیں ساھتاں
منی زمین ءِ تپتگیں بدن گریت
گند ایت وھدے ماتاں پیر ءُ آجزیں
تل وس ایت ، زنزر ایت ءُ گیمر ایت
ھمے دمان ءَ دْروتے راھی کنت ھدا ءِ نیمگ ءَ
پہ بژن گُش ایت
اے! ھدا کجانگر اِنت ھیال تئی
کجانگو باریں گار کُتگ تو ھوش وتی
وت ءَ تو گُنگ ءُ کَر کُتگ
ھدا بلوچ ءِ کُشت ءُ کوش ءَ بلکیں تو ھوار ئے گوں
نہ اِشکن ئے تو پرچا آھاں ماتے ءِ
نہ مار ئے درداں پرچی ءَ تو بے وسیں گْوھارے ءِ
ھدا تو چماں شانک دے ءُ کیچ ءَ شَری ءَ بچار
ھدا بچار میّتے ءِ آتراپ ءَ گریوگ انت
کہ یک گْوھارے پہ وتی برات ءَ ارس ریچگ اِنت
ءُ پیریں ماتے چہ ترا انساپ لوٹگ اِنت
ھدا داں کد بلوچیں مات گریو اَنت بچاں پہ وتی
ھدا داں کد اے زُلم ءِ آس بلوچ ءِ جان ءَ روک بیت