بلوچ سلاہ بندیں گلانی ھواری
ٹی بی پی شونگال
بلوچستان ءَ گوستگیں بیست سالاں چہ بُرز اِنت کہ آجوئی ءِ جھد برجاہ اِنت ءُ بازیں سلاہ بندیں گل پاکستان ءِ ھلاپ ءَ بلوچ راجی آجوئی ءِ ھاتر ءَ سُر ءُ پُر کنگ ءَ اَنت۔ اے دو دھکانی تہ ءَ بلوچ سلاہ بندیں گل بازیں بُرز ءُ جھلیانی دیمپان بیتگ اَنت، وت ما وتی جیڑہ ءُ مانگیشگ ءَ ابید ھم بلوچستان ءِ تہ ءَ وتی مھکمیں ھستی برجاہ داشتگ اِش۔
دوھزار ءُ ھژدہ ءَ بلوچ لبریشن آرمی، بلوچستان لبریشن فرنٹ، بلوچ ریپبلیکن گارڈز ءُ بلوچ ریپبلیکن آرمی ءِ ھمسنتی بلوچ راجی آجوئی سنگر ءِ جوڑ بیگ ءَ پد بلوچ سلاہ بندیں گلانی تہ ءَ گیشتر نزیکی اتکگ ءُ ھمے زیتاں بی ایل اے ءِ کماندار بشیر زیب ءُ بی ایل ایف ءِ کماندار ڈاکٹر اللہ نزر ءَ دویں گلانی ھواری ءِ نیمگ ءَ پیش گامی کنگ ءِ درشان کُتگ۔
گوستگیں لھتیں سالانی تہ ءَ بلوچ سلاہ بندیں گل ھاسیں پئیماں بلوچ لبریشن آرمی ءُ بلوچستان لبریشن فرنٹ ءِ جنگی کارشونانی تہ ءَ بدلی اَتکگ آیاں پاکستانی پوج ءِ سر ءَ ترندتریں اُرش کُتگ اَنت کہ ایشانی تہ ءَ پوج ءَ مزنیں کچے ءَ جانی تاوانانی دیمپانی کنگ کپتگ اَنت۔ براس ھمسنتی ءِ جوڑ بیگ ءَ پد سلاہ بندیں گلانی شوربندی ءُ ترندیں اُرشانی تہ ءَ گیشی اَتکگ۔
بی ایل اے ءِ پدائیں اُرشانی بُنزہ مجید بریگیڈ ءَ اُرشانی تہ ءَ شاھگانی آرتگ ءُ پاکستان ءِ بنجاھی شھر ءَ چین ءُ پاکستان ءِ سپارتی ءُ زرکاری مپادانی سر ءَ اُرش کُتگ اَنت چریشی ءَ چین ءِ بلوچستان ءِ تہ ءَ زرکاری کنگ ءَ جنجالانی آماچ اِنت۔ براس ءُ بی ایل ایف ءَ رکیتگ سرپد بیتگیں تیاپ دپی مزن شھدگ ءِ سر ءَ پاکستانی نیوی،کوسٹ گارڈ ءُ پوج ءِ سر ءَ مزنیں ارش کُتگ اَنت کہ اِیشانی تہ ءَ پوج ءَ مزنیں کساسے ءَ جانی تاوان چِست کنگ کپتگ۔
بلوچستان ءِ درستاں گیشتر سُر ءُ پُر کنوکیں گل بلوچستان لبریشن فرنٹ ءُ بلوچ لبریشن آرمی ءِ ھواری ءِ نیمگ ءَ جُنزگ ءَ چہ بلوچ سلاہ بندیں گلانی جنگی تاکت ءِ تہ ءَ گیشی کئیت ءُ ھواریں جنگی آسراتی آیانی گل ءِ مھکمی ءِ سوب جوڑ بیت۔ اے گلانی ھواری ءَ چہ بلوچستان ءَ برجاھیں جنگ ءِ شدت ءَ گیشی کئیت اِنت کہ چریشی ءَ درملکی زرکاری ءِ شوربندیانی سر ءَ اُرش ود ات کن اَنت ءُ دومی نیمگ ءَ پاکستانی پوج ءِ سکی ءُ جنجالانی تہ ءَ باز گیشی اَتک کنت۔