پاکستانی پوج ءِ دروگیں میڑ، بیگواھیں مردمانی کھول ترس ءِ آماچ

بلوچستان ءَ زورانسری آوار جنگ بوتگیں مردمانی کھول ءِ گوشگ انت کہ بلوچستان ءِ تہ ءَ انسانی المیہ ءِ ودی بوتگ، ھزارانی کچ ءَ مردم بیگواہ انت ءُ تنی وھدی زورانسری آوار جنگ بوتگیں مردمانی دروگیں میڑ ءَ کوش برجاہ انت، کہ چریشی ءَ بیگواھیں مردمانی کھول ترس ءِ آماچ انت –

بیگواھیں مردمانی کھولاں چہ انسانی ھکانی ادارھاں گوں لوٹ کتگ کہ آیانی دوستگیں مردمانی وش ءُ سلامتی یل کنائینگ ءَ وتی کرد ءَ پیلو بہ کن انت –

سوراب ءِ جھمنند زورانسری آوار جنگ بوتگیں سیف اللہ رودینی ءِ گھار پرزانہ رودینی ءِ گوشگ انت کہ منی برات سیف اللہ ءِ زورانسری آوار جنی ءَ دھ سال سرجم بوتگ انت اے دھیں سالاں ما ھر ھمک در ٹُک اِتگ ءُ توار چست کتگ بلے روچ مروچی اے ریاست ءِ نیمگ ءَ بید مایوسی ءَ دگہ ھچ نہ رستگ –

آئی ءَ گوشتگ کہ منی برات یل کنگ بہ بیت ءُ مارا چہ اے زوراکی ءِ تہ ءَ رکینگ بہ بیت – سیف اللہ بیست ءُ دو نومبر سال دوھزار سینزدہ آوار چہ سوراب ءَ دیم پہ ھزدار ءَ رؤگے وھد ءَ زورانسری آوار جنگ ءُ بیگواہ کنگ بوتگ –

سِی ءُ یک اگست سال دوھزار ھژدہ ءَ چہ پکنک پوئنٹ زنگی ناوڈ زورانسری آوار جنگ بوتگیں آصف بلوچ ءُ رشید بلوچ ءِ گھار سائرہ بلوچ ءَ گوشتگ کہ منی براتانی زورانسری آوار جنی ءَ پنچ سال سرجم بوتگ انت – زورانسری آوار جنی روچانی گیش بوگ ءَ ما ماژگی نادراھ جوڈ بوان انت – پہ فلسطین ءِ ھاتر ءَ ارس ریچوکیں پاکستانیاں گوں دزبندی انت کہ کمو بلوچستان ءِ مردمانی نیمگ ءَ دلگوش بہ دئنت کہ شمے پوج ءَ مئے زند ویران کتگ –

زورانسری آوار جنگ بوتگیں ممتاز ءِ گھارزتگ بانڑی بلوچ ءَ گوشتگ کہ بلوچستان ءِ مات ءُ گھار وتی دوستیگیں مردمانی ھاتر ءَ وتی ھوناں جوشین انت ءُ آیاں مزن کناں وانین انت تاکہ باند ءَ آ پیر بنت ءُ آ آیانی سھارگ بہ بنت، سھارگ دیگ وتی جاہ ءَ نوں پہ دیدار ءَ تلوسگ انت – بانڑی بلوچ ءِ ناکو ممتاز بلوچ شش ستمبر سال دوھزار ءُ بیست ءُ دو ءَ چہ ھزدار ءَ آوار جنگ ءُ بیگواہ کنگ بوتگ – دو رند ءَ آ پیسر ءَ ھم آوار جنگ ءُ یل کنگ بوتگ –

بیگواھین باپاری مردم عبدالحمید زھری ءِ زھگ سعیدہ حمید ءِ گوشگ ات کہ ماھروز ءُ ھمل وتی پت ءِ ودار ءَ نشتگ ءُ وتی پت ءِ آیگ ءِ راہ ءَ چارگ انت، وانگ وانگ انت، دلسیاھی ھم کنگ ءَ نہ انت – زورانسری آوار جنوک بیت کنت سرپد مہ بنت کہ گس ءِ یک مردمے ءِ آوار جنگ ءُ بیگواہ کنگ ءَ ناکہ ایوک ءَ یک ءَ آوار جنگ انت بلکنہ آ گس ءِ درسیں وشی، زھگانی کندگاں ھم آوار جنگ انت * سعیدہ حمید ءِ پت عبدالحمید زھری دھ اپریل سال دوھزار ءُ بیست ءُ یک ءَ آوار جنگ ءُ بیگواہ کنگ بوتگ – عبدالحمید ھم چو ایندگہ بیگواھیں مردمانی وڈا گار انت ھچ ھال اھوال نیست –