پنجاب ءَ بلوچ نودربر ءُ گوادر شھدربرجاہ لاھور
ٹی بی پی شونگال
پاکستان ءِ راجی پتر ءَ نوکیں شھدربرجاھانی جوڑ کنگ ءِ بیست بِل یکجاہ ءَ منگ بیتگ اَنت، کہ ایشانی تہ ءَ پاک-چین گوادر شھدربرجاہ ھم ھوار اَنت، کہ لاھور ءَ اڈ کنگ بیت اِنت۔ بلوچستان ءَ اے وھد ءَ ھژدہ شھدربرجاہ ھست اَنت، کہ آ تھنا لاھور ءِ شھدربرجاھاں چہ ھم کمتر اَنت، درستاں چہ کوھنتریں بلوچستان شھدربرجاہ مزنیں مالی تَنگی ءِ آماچ اِنت ءُ دگہ شھدربرجاہ ھم مالی ءُ واکدارانی جنجالانی آماچ اَنت۔
بلوچستان ءِ نودربر یکشلی ءَ گوں زھرشانی کنگ ءَ اَنت کہ بلوچستان ءَ نوکیں شھدربرجاہ جوڑ کنگ بہ بنت بلے بلوچستان ءَ شھدربرجاہ ءِ اَڈ بئیگ ءَ ابید پاک-چین گوادر شھدربرجاہ ھم لاھور ءَ اڈ کنگ بئیگ ءَ اِنت ءُ دومی نیمگ ءَ ھما کہ لھتے گچینتگیں بلوچ نودربر پنجاب ءِ شھدربرجاھانی تہ ءَ وانگ ءَ اَنت، آیانی تہ ءَ فیصل آباد، بھاولپور، ملتان ءُ لاھور ءِ شھدربرجاھانی تہ ءَ پروفائلنگ ءُ زورانسری بیگواھی ءِ وئیلانی تہ ءَ گیشی پِیداک اِنت۔
گوستگیں روچاں قائد اعظم شھدربرجاہ ءِ دو بلوچ نودربر چہ اسلام آباد ءَ زورانسری بیگواھی ءِ آماچ کنگ بیتگ اَنت، پنجاب شھدربرجاہ لاھور ءِ نودربر سالم بلوچ چہ تربت ءَ زورانسری بیگواہ کنگ بیتگ اَت ءُ ایرڈ ایگریکلچر شھدربرجاہ چہ راولپنڈی ءَ ھبدہ سالی نودربر فیروز بلوچ ءِ زورانسری بیگواھی ءَ یک سالے گوستگ اَت ءُ آمید گسی پرمان ءَ ابید داں انگت یل کنگ نہ بیتگ ۔ اسلام آباد ھائی کورٹ ءَ پرمان داتگ اَت کہ پنجاب ءِ شھدربرجاھانی تہ ءَ بلوچ نودربرانی پروفائلنگ ءُ زورانسری بیگواھی بند کنگ بہ بنت بلے اِیشی ءَ ابید ھم نودربرانی زورانسری بیگواھی انگت برجاہ اَنت۔
بلوچ راجدوست پاکستان ءِ سر ءَ بھتام جن اَنت کہ پُل ءُ پانچی شوربندی چین پاکستان روزیگی راھداری ءِ سوب ءِ بلوچ راج ءِ نسل کشی ءُ آبادی ءِ مٹ بیگ ءِ دیمپانی اِنت ءُ اِیشی ءِ مَٹ پنجاب ءَ رسگ ءَ اَنت، بلوچستان ءَ پوجی بیڑ برجاہ اَنت ءُ پنجاب ءَ میٹرو ءُ شھدربرجاہ جوڑ کنگ بئیگ ءَ اَنت۔
پاکستان ءِ تاکتوریں واکدار بلوچستان ءَ گوں یک ایردستی ءِ پئیم ءِ رویش ءَ بند بہ کن اَنت ءُ بلوچ زمین ءَ گوں بندوکیں شوربندی ھم بلوچستان ءَ اڈ کنگ بہ بنت۔ تھنا ٹاہ ءَ گوں بلوچستان ءِ مھلوک رد دیگ بیت نہ کن اَنت، بلوچ راج یکشل ءَ اے شوربندیانی درگت ءَ وتی تُرس ءُ بے باوری ءِ درشان ءَ کنان اَنت ءُ داں وھد یکہ بلوچ سرڈگار ءِ سر ءَ شوربندیانی مُز بلوچ ءَ نہ رس اتگ ھما وھد ءَ داں بلوچستان ءِ تہ ءَ اے شوربندیانی سرجم بئیگ بے باوری اِنت۔