بلوچستان ءَ ھار ءِ آدُراھی
ٹی بی پی شونگال
بلوچستان ءِ جتاجتائیں دمگاں بشامی ھورانی درچ برجاہ اِنت چریشی ءَ بازیں شھرانی تہ ءَ ھار ءِ جاورھال ودی بیتگ انت۔ چہ یکشلیں ھوراں بولان، نائی گاج، تَلی، مولا، لھڑی ءُ رخشاں کور ءَ مزنیں کچے ءَ آپ اَتکگ ءُ ھار ءِ آپ ءِ سوب ءَ کِشار بُڈاتگ اَنت، بازیاں لوگ ڈُراتگ اَنت، کور ءَ مزنیں کچے ءَ آپ ءِ آیگ ءِ سوب بازیں راہ بند بیتگ اَنت ءُ ھزارانی کچ ءَ مھلوک پچیں آزمان ءِ چیر ءَ زند گوازینگ ءَ لاچار اَنت۔
ھار ءَ بازیں دگ بُرتگ اَنت ءُ بلوچستان ءِ سندھ ءُ پنجاب ءَ گوں زمینی رھوت پرُشتگ۔ بولان ءِ کور ءِ ھار ءَ آپ ءِ آیگ ءَ پد سندھ ءُ پنجاب ءَ گوں رھوت پرُشتگ۔ پنجرہ پل ءِ پرشگ ءَ چہ ھزارانی کچ ءَ گاڑی ءُ مردم بولان ءَ گَٹ اتگ اَنت۔
نصیر آباد، جھل مگسی، سبی، ماشکیل، واشک، ھاران ءُ پنجگور ءَ ھار ءَ مزنیں تاوانباری یے کُتگ ءُ بازیں ھانواد سانمند بیتگ اَنت۔ بازیں بان کپتگ اَنت ءُ بازیں دمگانی تہ ءَ ناتوام ءُ ھرابیں مواداں گوں جوڑ کُتگیں ڈیم پرُشتگ اَنت۔ ترندیں ھارانی سوب ءَ داں اَنگت پنچ مردم بیران بیتگ اَنت۔
بلوچستان ءَ بیتگیں گوستگیں سال ءِ ھار ءِ تاوانباریاں چہ مردماں داں اَنگت درکپت نہ کُتگ ءُ سرکاری ٹاھاں ابید ھم آ داں انگت کمک ءِ راھچار اَنت۔ ھزارانی کچ ءَ کھول بے لوگ اَنت ءُ یک سالے گوزگ ءَ پد ھم پچیں آزمان ءِ چیر ءَ زند گوازینگ ءَ اَنت۔ ھب ءُ بولان ءَ ھاری آپ ءَ بُڈاتگیں بند داں انگت اڈ کنگ نہ بیتگ اَنت ءُ بلوچستان ءِ گیشتر دمگانی دگ ھم ھار ءَ بُرتگ اَنت۔
لس تکانی رد ءَ بلوچستان ءَ جنگانی تہ ءَ کارمرز کنگ ءَ پہ آسراتی ءِ کمی نہ اِنت بلے چہ ھار ءَ سانمندیں مردم گوستگیں سالے ءَ چہ کمک ءِ راھچار اَنت ءُ سرکار تھنا بٹاکانی ھد ءَ بندوک اِنت۔ گوستگیں سالے تاوانباریاں چہ در نہ کپتگ اِت اَنت کہ انیگیں ھار ءَ سانمندانی جنجالانی تہ ءَ گیشی آورتگ ءُ سرکارکی نادلگوشی ءِ سوب ءَ ھار ءَ سانمندیں مردمانی جنجال ھمک روچی رد ءَ گیشتر بیان اَنت۔
اے المی اِنت کہ بلوچستان سرکار ءُ نیشنل ڈیزاسٹر مینجمنٹ اتھارٹی جار سانمندانی پد ءَ آباد کَنگ ءِ کار ءَ زیت سرجم بہ کن اَنت ءُ چہ ھار ءَ رکینگ ءِ ھاتر ءَ شاھگانیں پالیسی یے اڈ بہ دے اَنت۔