گوادر ءُ پنجگور ءَ بمب تراک

گوادر ءُ پنجگور ءَ بیتگیں دو بمب تراکاں چار مردم زدگ بیتگ اَنت-

بلوچستان ءِ تیابدپی شھر گوادر ءُ گوستگیں شپ ءَ جنت بازار ءِ نزیک ءَ یک لوگے ءِ سر ءَ دزبمبے چگل دیگ بیتگ – چریشی ءِ آسر ءَ چار مردم زدگ بیتگ اَنت-

ایس ایس پی جواد طارق ءِ رد ءَ زدگ بیتگیں مردمانی تہ ءَ سیادی داروکیں استان پنجاپ ءِ ھند بھاولپور ءِ زائد انساری نامیں مردے گم ھوار اِنت کہ سونارے بیتگ اے مرد باڑو داریں لوگے ءَ نندوک بیتگ –

ایس ایس پی ءَ گوشتگ کہ زدگ بیتگیں مردمانی دو دمگی مردم جواد اصغر ءُ میار ھوار اَنت، زدگ بیتگیں مردم ھسپتال ءَ برگ بیتگ اَنت-

ھمے ور ءَ پنجگور ءِ دمگ ھدابادان ءَ بلوچستان نیشنل پاٹی عوامی ءِ رھشون اسد بلوچ ءِ لوگ ءِ سر ءَ ناشناسیں مردماں گوستگیں شپ ءَ دزبمبے چگل داتگ ءُ پشت مانداتگ ءُ شتگ انت-

دزبمب ءِ ترگ ءَ ترندیں تراکے ءَ توار کتگ بلے دگہ جانی تاوانانی اھوال نہ بیتگ اَنت-

گوستگیں بیست ءُ چار ادارانی توک ءَ بلوچستان ءَ چار بمب تراکانی وئیل رپورٹ بیتگ اَنت-

ھمے داب ءَ گوستگیں روچ ءَ بولان ءِ ھند منسور ٹاپ ءِ ھند ءَ ناشناسیں مردماِ پاکستانی پوج ءِ پوسٹ ءَ اپ سرکنوکیں ٹریکٹر تراک ءِ نشانگ کتگ ءُ پد ءَ ھمے جاہ ءَ سر بیتگیں پوج ھم نشانگ کتگ –

تراک ءَ پوج ءَ دو کارندھاں ھوار دو مردمانی ھال راست کتگ ات-

بولان ءِ بمب تراک ءِ زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ من اتگ ات ءُ ایشی ءِ ھواری ءَ ھرنائی ءَ ھم موبائل ءِ ٹاور ءِ زمہ واری یے من اتگ ات-