پہ انساپ ءَ جنگ، ھزدار شھدربرجاہ ءِ نودربرانی زھرشانی ءُ دزگیری
ٹی بی پی گچینی
ھزدار یونیورسٹی آف انجینئرنگ اینڈ ٹیکنالوجی ءَ سئے شمبے ءِ روچ ءَ ھما وھد ءَ نگیگیں جاورھال ودی بیت اَنت، وھدے پولیس ءَ ھوار فرنٹیئر کور (ایف سی) ءِ کارندھاں شھدربرجاہ ءِ کیمپس انگر کُت ءُ بازیں زھرشانی کنوکیں نودربر دزگیر کُت اَنت، کہ آ وتی زنگاں سانمدیں توار ءِ دیگ ءِ ھاتر ءَ یک جاہ مُچ بیتگ اِت اَنت۔
شھدربرجاہ ءَ ھستیں نودربر گل گرینڈ اسٹوڈنٹس الائنس(BUETK)ءَ سئے شمبے ءِ روچ ءَ چکاسانی بائیکاٹ کنان ءَ شھدربرجاہ ءِ واکدارانی سر ءَ بھتام جنان ءَ گُشتگ کہ آ چکاس کنٹرولر ءِ دیر کنگ وتی سوگند ءَ بج اتگ اَنت۔ کنٹرولر ءِ سر ءَ شھدربرجاہ ءِ کیمپس ءَ نودربرانی ءُ ھاس جِنکیں نودربرانی بلیک میل کنگ ءِ بھتام بیتگ۔ نودربرانی یک ھاسیں مچی ءِ پہ زھرشانی ءَ یکجاہ بیتگ اَت۔ کہ آیاں کنٹرولر ءِ کَشَگ، کیمپس ءُ ھاسٹلاں چہ گیر زلوری کیمرھانی دیر جنگ، اسکالرشپسانی برجاھی، نودربرانی مچیانی سر ءَ جتگیں بندش ءِ ھلاسی، ءُ ٹیوشن فیس ءِ تہ ءَ کمی ءِ لوٹ کُتگ اَت۔
اھوالانی رد ءَ شھدربرجاہ ءِ واکداراں کانود برجاہ داروکیں ادارگاں گوں زھرشانی کنوکیں نودربرانی گِر ءُ دار کَنگ ءِ لوٹ کُتگ۔ پولیس ءُ ایف سی ءِ بازیں گاڑیاں شھدربرجاہ انگر کتگ اَت کہ ایشی ءِ آسر ءَ بازیں نودربر دزگیر کنگ بیتگ اَنت، کہ آیاں گوں بدسلوکی کنگ بیتگ، زور گاڑیاں مان کنگ ءُ برگ بیتگ اَنت۔ داں انگت دزگیریں نودربرانی جاورھال پدر نہ اِنت۔
شپ ءَ دیرءَ نودربرانی ءُ شھدربرجاہ ءِ واکدارانی نیام ءَ ترانکاری ءِ درچ بندات بیتگ اَت، البت نودربراں وتی ھمراھیں نودربرانی یل بئیگ ءَ داں زھرشانی ءِ برجاہ دارگ ءِ جزم کُتگ ات۔
یات بہ بیت کہ نودربراں یک ماھے ءَ ساری ءَ مزنیں کچے ءَ وتی زھرشانیانی درانگازی کُتگ اَت کہ اود ءَ ایندگہ لوٹانی پجیگ ءَ آیاں چکاس کنٹرولر ءِ کَشَگ ءِ لوٹ کُتگ اَت، نودربراں کنٹرولر ءِ سر ءَ سلکاری ءُ بلیک میلنگ ءَ ھوار بئیگ ءِ بھتام جتگ اَت۔ آ زھرشانی ھما وھد ءَ ھلاس بیت وھدے چکاس کنٹرولر ءَ یک ماھے ءِ تہ ءَ وتی اگدہ ءَ چہ درکنگ ءِ کول کنگ بیتگ اَت۔
بد بھتی ءَ نودربرانی لوٹ ءِ سرجم بئیگ ءَ ابید ماہ سرجم بیت۔ چکاس کنٹرولر کہ آئی ءِ ھلاپ ءَ نودربراں زھرشانی کُتگ اَت داں انگت شھدربرجاہ ءِ گُڈی چکاسانی نگاہ داری ءَ کَنگ ءَ اِنت۔ دروھگ ءُ بے امیتی ءِ مارشتانی پجیگ ءَ نودربراں یک برے پدءَ زھرشانی ءِ کِشک گِپتگ بلے اے رندءَ آیاں دزگیری ءُ زندان ءُ بندیگ جاھانی دیمپانی کنگ کپتگ۔
جتائیں گلاں بلوچستان یونیورسٹی آف انجینئرنگ اینڈ ٹیکنالوجی ءِ تہ ءَ پرایمنیں زھرشانی کنوکانی گیر کانودی دزگیری ءِ تُرس ءِ درشان کُتگ ءُ گُشتگ کہ زھرشانی ھمک شھری ءِ بُنکی اگبال اِنت۔ وھدیکہ نودربر چہ آیانی اگبالاں زبھر کنگ بنت گُڑا آیانی یکیں راہ زھرشانی ءِ دروشم ءَ وتی ھیالانی درشان کنگ اِنت۔ دگہ یک نودربریں گل بلوچ اسٹوڈنٹس ایکشن کمیٹی (بساک) ءَ BUETK ءِ تہ ءَ نودربرانی دزگیری ترُندی ءَ گوں ایر جتگ۔
گل ءَ پر ایمنیں نودربرانی ھلاپ ءَ تاکت ءِ ترندیں کارمرزی ءِ سر ءَ ترُس ءِ درشان کُتگ، ءُ بلوچستان ءِ شھدربرجاھانی تہ ءَ بلیک میلنگ، شِدت ءُ گیر کانودی دزگیریانی ءِ تالانی ءِ پدر کَنگ ءِ کوشست کُتگ۔
بساک ءَ اپسوز ءِ درشان کنان ءَ گُشتگ کہ بلوچستان ءِ شھدربرجاہ بے کساس جیڑھانی آماچ اَنت۔ کہ ایشانی سوب ءَ ادارگ وانگی سال ءِ گیشتر وھداں داں بند بنت۔ نودربر ءُ اُستاد (وانینوک) وتی جائزیں لوٹانی گون ءَ مدام دگانی سر ءَ درکپ اَنت بلے آیانی دزبندی کسی گوش ءَ سر نہ بنت۔ آئی ءِ گشگ اَت کہ گپ ءُ تران ءَ ابید پرگینگی سرکار ءُ دمگی واکدار تاکت ءِ کارمرزی ءِ کمک ءَ زیر اَنت۔
بساک ءَ بلوچستان یونیورسٹی آف انجینئرنگ اینڈ ٹیکنالوجی ءِ نودربرانی گون ءَ یکجاھی ءِ درشان کنان ءَ درستیں جائزیں لوٹانی منگ بوگ ءَ داں وتی پلامرزی ءِ برجاہ دارگ ءِ کئول کُتگ۔ آیاں گُشتگ کہ زھرشانی بُنکی اگبال اِنت ءُ تاکت ءِ کارمرزی ءَ گوں بگیر داریں لیکہ ءِ زورپر دیگ ءِ کردگار ءَ ترندی ءَ گوں ایر جنیں۔ داں منگ نامہ ءِ سر ءَ وتی پلامرزی ےَ برجاہ داریں-
بلوچستان یونیورسٹی آف انجینئرنگ اینڈ ٹیکنالوجی ءَ بیتگیں وئیل جتائیں وئیلے نہ اِنت، ھمے پئیمیں وئیل جتاھیں شھدربرجاھاں ھم دیم ءَ اَتکگ اَنت۔ ھاسیں پئیماں ستمبر 2019 ءَ یونیورسٹی آف بلوچستان ءَ ھم انچیں وڑیں جیڑھے دیم ءَ اَتکگ اَت، کہ اود ءَ شھدربرجاہ ءِ لھتے واکداراں لاچاریں نودربرانی اکس ءُ تامر اڈ کُتگ اِت اَنت کہ آ بلیک میل کنگ بہ بنت۔ آ وئیل ءَ مزنیں کساسے ءَ زھر ءُ گم ءِ ودی کُتگ ءُ بلوچستان شھدربرجاہ ءَ ھستیں سلکاری ءُ بلیک میلنگ ءِ ربید پدر کُتگ اَت۔
بلوچستان ءِ شھدربرجاہ گیشتر لشکرجاھانی دروشم ءَ دے اَنت کہ اود ءَ کیمپسانی تہ ءَ ءُ ڈن ءَ فرنٹیئر کور ءِ گاڑیاں گشت کنان ءَ گندگ بنت۔ ھاسیں پئیماں بلوچستان شھدربرجاہ کہ آ وتی گیٹ ءُ کیمپس ءِ تہ ءَ ایف سی کارندھانی ھستی ءِ سوب ءَ نامدار اِنت۔ نودربر ءُ دگہ مردمانی شھدربرجاہ ءَ پترگ ءَ مزنیں گھگیری ءِ دیمپانی کنگ کپتگ اَت، آیاں نہ تھنا اسٹوڈنٹ کارڈ بلکیں پجار کارڈ جم پیشدارگ کپتگ اَنت۔ بازیں وھداں نودربراں پھازگی لشکریانی دست ءَ لٹ شاپی ءُ شِدت ءِ نشانگ کنگ بیت اِنت۔ گیشتر ایش کہ دری تاکت شھدربرجاہ ءِ جیڑھانی تہءَ پدراھیں دروشمی ءَ دزمانجنی کُن اَنت ءُ داں ادا کہ کیمپس ءُ ھاسٹلانی بازیں نودربر ھم زورانسری بیگواھیانی آماچ کنگ بیتگ اَنت۔
گوزوکیں وھدے پجیگ ءَ جاورھال گیشتر نگیگ بیان اَنت۔ یات بہ بیت چشیں وھداں کہ انڈیا ءُ پاکستان ءِ نیام ءَ کرکٹ ءِ گوازی بنت ایشی ءِ ھمرائی ءَ مزنیں کساسے ءَ پھازگی لشکری ھم شھدربرجاہ ءِ ڈن ءَ آرگ بنت۔ اے پدگرد ستمبر 2022 ءَ ایشیا کپ ءِ فائنل کرکٹ گوازی ءَ سری لنکا ءِ دست ءَ پاکستان ءِ پروش وری ءِ سر ءَ نودربرانی پُرجزبگیں مراگشاں پد ودی بیت، کہ اِیشی ءَ پھازگی لشکری زھرناکی داتگ اَنت ءُ آیاں چہ شال ءَ درزنانی کساس ءَ نودربر دزگیر کُتگ اِت اَنت۔
بلوچستان ءَ نودربرانی زندمان بازیں سکیانی دیمپان اَنت۔ نودربر ءُ اُستادانی زھرشانیانی سوب ءَ شھدربرجاہ گیشتریں وھداں بندش ءِ آماچ بنت کہ چریشی ءَ وانگی سُر ءُ پُر سانمند بنت۔ داں انچوکا کہ کسانیں جیڑھانی سر ءَ شھدربرجاہ ءِ واکدار فرنٹیئر کور ءَ لوٹارین اَنت کہ اے یک ھترناکیں وئیلے ءُ بلوچستان ءَ تاکت ءِ کارمرزی ھمروچی کسہ جوڑ بیتگ۔ جاورھال یکشلی ءَ گوں گیشتر نگیگ بوان اَنت کہ آودہ نودربر پھازگی لشکریانی ھستی ءَ ابید کرکٹ ءِ لئیب ھم چارت نہ کن اَنت۔