اسکاٹش ءِ زِر ءَ پنجاہ ءَ گیش وھیل ماھیگ مرتگ انت

ہیبرائڈس ءِ زر ءَ بازیں پائلٹ وھیل ماھیگ پنس اِتگ ءُ مرتگ انت کمکی باسکاں بس یک وھیل ماھیگے رکینت کُتگ – زانتکار گمان کنگ انت کہ بوت کنت اے وھیل چُک پیداک کنگ ءِ دلسیاھی ءِ آماچ بوتگ انت –

برتانیہ زری کمکی باسکاں شانزدہ جون ءَ یکشمبے ءِ روچ ءَ گوشتگ کہ اسکاٹ لینڈ ءِ یک دوریں زری ھُشکی ءَ پنجاہ ءَ گیش پائلٹ وھیل ماھیگ پنس اِتگ ءُ مُرتگ انت –

زر ءِ درگت ءَ سرپدی داروکیں برتانیہ ءِ ادارہ برٹش ڈائیورز میرین لائف ریسکیو چیرٹی (بی ڈی ایم ایل آر) ءَ گوشتگ کہ آؤٹر ہیبرائیڈز ءَ آئل آف لیوس ءِ گور ءَ پنجاہ ءُ پنچ وھیل ماھیگ چولاں آورتگ –

پولیس ءَ یکشمبے ءِ سھب ءَ بی ڈی ایم ایل آر سرپد کُتگ کہ زر ءَ پائلٹ وھیل ماھیگ پنس اِتگ انت ھمے میان ءَ کمکی ٹولی ءَ ھما دمان ءَ شُتگ ءُ آھانی تہ ءَ دو ماھیگ رکیں اِتگ ءُ سوبمندی ءَ گوں زر ءَ دیم داتگ انت آھانی تہ ءَ ھم بس یکے رک اِتگ ءُ دومی مرتگ –

ادارہ ءَ وتی یک درشانے ءِ تہ ءَ گوشتگ کہ بدکستمی ءَ ھما دوبر زر ءَ یل داتگ بلے آئی ءَرک اِت نہ کُتگ –

اسکاٹ لینڈ ء پائلٹ وھیل رکینگ ءِ جھد

اگاں آ پائلٹ وھیل ماھیگ گوشگ بنت بلے پائلٹ وھیل ماھیگے سیادی ھم چہ ھما کھول ءَ انت کہ آئی ءَ ڈولفن گوش انت – آ دراجی ءَ شش میٹر (بیست فُٹ) مزن بیت ءُ آئی ءِ وزن یک میٹرک ٹن ءِ بیت –

برٹش ڈائیورز میرین لائف ریسکیو چیرٹی ءَ وتی درشانے ءِ تہ ءَ گوشتگ کہ تنی وھدی ھمے گمان کنگ بیت کہ یک مادگیں وھیل ماھیگے چکے پیداک کنگے سوب ءَ سرجمیں رمگ پنس اِتگ –

کمکی باسکانی رِد ءَ پائلٹ وھیل وتی مھکمیں چاگردی نزیکیانی سوب ءَ سک بدنام انت ھمے واست ءَ کہ ھر ھما وھد ءَ وھدیکہ یک وھیل ماھیگے دلسیاہ بیت ءُ جاھے ءَ پنس ایت گڈا پدا درسیں ماھیگ آئی ءِ رندگیری ءَ کن انت ءُ پدا دراہ پنس انت –

اے ادارہ ءِ بنھشت سال 1988ءَ ایرکنگ بوتگ ءُ سرجمیں برتانیہ ءَ اسٹریٹجک جاھاں آھانی گور ءَ بیست وھیل ریسکیو پونٹونز ھست انت تانکہ پنس اِتگیں وھیل ءُ ڈولفن آنی کمک کنگ بہ بیت –

سال دوھزار یازدہ ءَ بگر تاں دوھزار پانزدھے میان ءَ اے ٹولی ءَ اسکاٹ لینڈ ءَ مزنیں کچے ءَ پائلٹ وھیل ماھیگ رکیں اِتگ انت ھمے وڈ یک وئیلے ءَ اے ٹولی ءَ ھپتاد ءَ گیش وھیل ماھیگ کہ پنس اِتگ بوتگ ھما دمان ءَ شُتگ ءُ آ رکّیں اِتگانت –