کیچ ءُ کلات ءَ پاکستانی پوج ءِ سر ءَ اُرش، دشت ءَ موبائیل ٹاور ءِ ماندارگ بوتگ

سربوتگیں ھالانی رِد ءَ بلوچستان ءِ دمگ کلات ءُ کیچ ءَ پاکستانی پوج ءِ سر ءَ اُرش کنگ بوتگ اُرش ءَ پاکستانی پوج ءَ تاوان رستگ ءُ دشت ءَ ناشناسیں مردماں موبائیل ٹاور ءِ مانداشتگ –

گیشیں ھالانی رِد ءَ گوستگیں شپ ءَ ناشناسیں سلاھبندیں مردماں بلوچستان ءِ دمگ کلات ءَ شاہ مردان ھند ءَ پاکستانی پوج ءِ پانگسے ءِ سر ءَ اُرش کُتگ کہ اودا تاں دیراں تیر ءُ بمبانی توار بوتگ –

ھمے وڈ مروچی بلوچستان ءِ دمگ کیچ بلیدہ ءَ پاکستانی پوج ءِ تر ءُ گرد کنوکیں ٹولی ءِ تراکناکیں شورانی نشانگ کنگ بوتگ –

پوج ءِ اے کاروان بلیدہ ءِ ھند گردانک ءَ نشانگ کنگ بوتگ – اھوالکار ءِ بمب تراک ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ –

واکدارانی نیمگ ءَ تنی وھدی ھردو ارشانی درگت ءَ ھچ وڈیں درشان دیم ءَ نہ اتکگ ءُ ناکہ تاوان ءِ درگت ءَ چیزے گوشگ بوتگ –

دومی نیمگ ءَ کیچ ءِ دمگ دشت سنگئی ءَ چہ ھال آیگ انت کہ ناشناسیں سلاہ بندیں مردماں یوفون کمپنی ءِ موبائیل ٹاور ءِ مانداشتگ –

زانگ بہ بیت اے ھند ءُ دمگاں پاکستانی پوج ءُ موبائیل ٹاورانی ماندارگ ءِ زمہ واری گیشتر بلوچ آجوئی لوٹوکیں سلاہ بندیں گل منّ اِنت بلے تنی وھدی اے اُرشانی زمّہ واری ھچ گل ءَ نہ منّ اِتگ انت –