ماتیں وتن ءِ اشک
نبشتہ کار: ماہ گل بلوچ
دی بلوچستان پوسٹ
اشک یک اھساسے، اِشک گوں ھُدا بوت کنت، اِشک انسان ءَ گوں دومی انسان ءَ بوت کنت، اِشک یک چیزے ءِ گون ءَ بوت کنت، اِشک گوں وتی وتن ءَ بوت کنت، ڈیھ زمین ءَ گوں بوت کنت۔
وھدے یکے ءَ گوں وتی سرڈگار ءَ اِشک بیت گڑا اے ھما اِشک بیت انسان ءِ تہ ءَ ھما اھساس ءَ پیداک کنت کہ آئی ءَ چہ آدگہ مھلوک ءَ جتا کنت، اے ھما اِشک اِنت کہ انسان ءَ یک شریں کردے ءِ واھند کنت آئی ءِ تہ ءَ ھما شری ءَ کار ایت کہ مردم ءَ گوں وتن ءَ نزدیک کنت ءُ بلاھیں سک ءُ اوپارے ءِ واھند کنت۔
وتن دوستیں مردم وتی راجی گلامی ءَ مار ایت ءُ وتی راجی دودمان ءِ ارزشت ءَ سرپد بیت ءُ آ وتی گلامیں راج ءِ ھمک درد ءَ مار ایت۔ آ اے گپ ءَ شریں وڑے ءَ زانت من سرڈگارے ءِ واھنداں منی ڈگار درآمداں کبزہ کرتگ من ءَ پہ آئی ءِ موکگ ءَ ساہ ءُ سر ءَ سرگوزگ لوٹ ایت۔
چہ وتن دوستی ءَ سرڈگار ءِ اشک مردم ءَ زوراکیانی ھلاپ ءَ توار چست کنگ پرمائیت، ایشی ءِ یک مسالے ھمیش اِنت ھزارانی کچ ءَ بلوچ پسگاں پہ وتی ماتیں وتن ءِ رکینگ ءَ وتی ساہ ءُ سرانی کربانی داتگ۔ دگہ ھزارانی ھساب ءَ ورنایاں سر ءَ کپن بستگ ءُ دُژمن ءِ گون ءَ جنگ کنگ ءَ اَنت۔
ھمے وتن ءِ اشک اِنت ھزارانی کچ ءَ مردم زوراک ءِ چیریں زیندانانی تہ ءَ ازابانی دیمپان اَنت۔ ھمے وڑ ءَ زاکرجان اِنت، چیئرمین زاھد اِنت، لکمیر جان اِنت ءُ دگہ چنچو پلگدیں ورنا رستری زوراکیانی دیمپان اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔