یورپ ءَ بینجو ساز ءِ مراگش، مئے ازم ءِ ستا کنگ بوتگ – استاد نور بخش

بلوچستان ءِ نامداریں بینجو جنوک استاد نور بخش ءُ آئی ءِ ھمراھیں ازمکار چار شمبے ھمے سال ءِ جون ماہ ءَ جرمنی ءَ ھوار یورپ ءِ ایندگہ ڈیھاں ساز زیملی مراگش ءَ پہ شُتگ انت آیانی اے مراگش نوں ھلاس بوگ ءَ انت دیمے دو ساز ءُ زیملی مراگشاں پہ آ ڈیھ ءَ واتر بنت –

بینجو یک بلوچی سازے، اے اوزار دار ءِ سر ءَ جوڈ کنگ بوتگ کہ آئی سر ءَ بگر تاں جھل ءَ سَے بھرانی تہ ءَ بٹن لگّوک انت وھدیکہ آھانی چیر ءَ برز ءَ بگر تاں جھل ءَ تار لگ اِتگ انت – چپی نیمگ ءَ تاراں جھل یک ٹُنگ ءِ چِنگ بوتگ کہ آسِن ءِ ٹُکرے ءَ گوں ھمے تار سُرینگ بنت ءُ برز ءِ بٹنانی جنگ ءَ سازانی سُر دیگ بیت اِنت – اے ساز بلوچی ءُ یک ھدے ءَتاں سندھی سوتاں ھم کارمرز بیت اِنت –

گوستگیں شپ ءَ جرمنی ءِ بنجاھی شھر برلن ءَ بینجو جنوک اُستاد نور بخش ءُ آئی ءِ ھمراھاں وتی ازم درنگاز اِتگ ءُ سدانی کچ ءَ مردماں بھر زرتگ ءُ وشنود بوتگ انت –

ھمے وھد ءَ آئی ءَ گوں دی بلوچ پوسٹ ءِ اھوالکار ءَ گوں تران کنان ءَ گوشتگ کہ یورپ ءَ مردماں آ باز شرپ بکش اِتگ ءُ مئے ازم ءِ ستا کتگ –

آئی ءَ گوشتگ کہ ادا بلوچی زیمر ءُ بنجو سک باز دوست دارگ بوتگ –

بلوچی بینجو بلوچستان ءِ تہ ءَ چہ جاپان ءَ اتکگ کہ اول سر ءَ لیبوکے ءِ دروشم ءَ بوتگ – لھتے وھد ءَ آ دلگوش دیگ نہ بوتگ بلے نوں اے بلوچستان ءِ جوانتریں سازاں چہ یکے زانگ بیت ءُ میان استمانی ھم اشی ءَ دیمروی رستگ –

اُستاد نوربخش ءَ گوں ما ھمے گوشتگ کہ آ بلوچستان ءِ دمگ شادی کئور ءِ جھمنند انت – آ وھد ءَ آئی ءَ دوازدہ سال بوتگ کہ بینجو جنگ بندات کتگ ءُ آئی ءَ وتی اے سپر ءِ تہ ءَ سرجمیں بلوچستان ءِ نامداریں گُشندھانی گوم ءَ کار کتگ –

آئی ءِ گوشگ انت کہ چہ بینجو ءِ تاراں سرڈگار ءِ زیبائی ءُ بلوچ شائرانی شئیراں گوشاں –

آئی ءَ گوشتگ کہ چاگردی ترامجاھاں منی یک تامرے شنگ بوتگ گڈا آ تامر ءَ پد دانیال منی میتگ ءَ اتکگ ءُ مناں شوھاز کُتگ –

مراگش ءِ منیجر ءَ گوں مئے اھوالکار ءِ گوم ءَ تران کنان ءَ گوشتگ کہ اے نامداریں ازمکار ءِ شنگ بوتگیں تامرے گوشدارگ ءَ پد دانیال احمد ءَ استاد نور بخش ءِ شوھاز ءَ پہ اوڈیسی ءِ بندات کتگ –

آئی ءَ جوانیں وڈے ءَ بس دو مائیکرو فون ءِ ھمراھی ءَ روبرکت ءِ وھد ءَ ازمکار ءِ اولی البم ریکارڈ کتگ –

ڈیجیٹل ءَ ریلیز بوتگیں استاد نور بخش ءِ “جنگل ” تنی وھدی میان استمانی پریس نیمگ ءَ سک باز دلبڈی رسگ انت کہ آئی ءِ فزیکل ریلیز ءِ سر ءَ کار برجاہ انت –