پاک تاک ءِ سوچگ ءَ پژدر ءَ او آئی سی ءِ اژدری نیاد مروچی ماں جدہ ءَ بیت اِنت

سویڈن ءَ پاک تاک ءِ سوچگ ءِ پژدر ءَ نیکراھی کمکارین گل ءِ نیاد مروچی ماں یکشمبے ءِ روچ ءَ جدہ ءَ بوگی اِنت-

عرب نیوز ءَ سعودی پریس ءِ درور دیان ءَ گوشتگ کہ جدہ ءَ اسلامی کمکاریں فل او آئی سی ءِ ھیڈ کوارٹر ءَ بیوکیں نیاد سعودی عرب ءِ داوت ءَ برجم دارگ بوگ ءَ اِنت-

اوآئی سی ءَ اے وڑیں ھرکتانی سر ءَ بیھار دیان ءَ گوشتگ کہ اے دابیں کرد بوگی نہ اَنت ءُ یکے دومی شرپ ءِ ھیال دارگی اِنت ءُ اے دابیں کرد جنگ ءُ جدال ءُ ناشری ودی کن اَنت میان استمان چوشیں چیزانی ھک ءَ نہ اِنت-

زانگ بہ بیت چارشمبے ءِ روچ ءَ سویڈن ءِ بنجاھی شھر اسٹاک ھوم ءِ درستان مستریں مسیت ءِ دیم ءَ چہ عراق ءَ سیادی داروکیں سی ءُ ھپت سالیگیں پناہ گزین سلوان مومیکا ءَ پاک تاک ءِ کمشرپی کتگ ات ءُ آئی ءِ تاک سوتکگ ات اَنت-

او آئی سی ءِ نیمگ ءَ شنگ بیتگیں درشان ءَ بازیں ڈیھاں پاک تاک ءِ سوچگ ءُ دگی اسلامی جاھانی کمشرپ کنگ ءِ وڑیں وئیلانی دارگ ءِ لوٹ کتگ ءُ ترندیں گامگیج زورگ ءِ کڈنی کتگ-

اوآئی ایس ءَ دراھیں ڈیھانی سرکار کڈن کتگ اَنت ءُ گوشتگ اَنت آ رنگ ءُ نسل مردم مہ چار اَنت میان استمان ءِ چارٹر ءِ رد ءَ انسانی بنیاد ءَ ھکانی شرپ کنگ ءَ ریاستانی سر ءَ پرز بیت اِنت-

یورپی یونین ءَ شمبے ءِ روچ ءَ وتی یک جارے ءَ گوشتگ کہ اے دابیں وئیلاں ھچ نہ من ایت ءُ نسل پرستی ءُ درملکیانی ھلاپ ءَ کینگ دارگ ءَ ھچ وڑ ءَ اوپار کت نہ کنت-

جار ءَ گیش گوشگ بیتگ کہ یورپی یونین دمگی پھنات ءُ دگہ ڈیھاں مزھب ءُ دودانی سر ءَ اجوئی ءِ تکانی پلامرزی ءَ کنت-