من سرپداں کہ من ھک ءِ راہ ءَ رؤگ ءَ آں – سُمیہ کلندرانی ءِ گڈی ٹویٹ

کیچ ءِ بنجاھی شھر تُربت ءَ پاکستانی پوج ءِ کاروان ءِ سر ءَ پدائی اُرش کنوکیں سمیہ کلندرانی ءَ وتی ٹویٹر ءَ گڈی ٹویٹ ءِ تہ ءَ نبشتگ کہ ” من سرپداں کہ من کجا رؤگ ءَ آں، ءُ من راستی ءَ سرپداں، ءُ من ءَ آ وڑ جوڑ بوگی نہ انت کہ شما من ءَ جوڑ کنگ لوٹ ات –

زانگ بہ بیت سمیہ کلندرانی آسپ کلندرانی ءِ وارس انت – آسپ کلندرانی چاردہ سال ساری چہ ھزدار ءِ دمگ توتک ءَ زورانسری آوار جنگ ءُ بیگواہ کنگ بوتگ – چار سال ساری آسپ کلندرانی کماش ءَ وتی زھگ ءِ ودار ودار ءَ اے کوڈھیں دنیا یل داتگ –

مروچی تربت ءَ بوتگیں اُرش ءِ زمّہ واری بلوچ اجوئی لوٹوکیں سلاہ بندیں گل بلوچ لبریشن آرمی ءَ منّ اِتگ – گل ءِ جارکش جیئند بلوچ ءِ رِد ءَ اے اُرش بی ایل اے مجید برگیڈ ءِ سمیہ کلندرانی بلوچ ءَ کُتگ –

زانگ بہ بیت بی ایل اے مجید برگیڈ ءِ اے دومی زالبول انت کہ پدائی اُرش کُتگ چد ءُ پیسر کیچ ءَ سیادی داروکیں شاری بلوچ ءَ چینی کاردارانی سر ءَ پدائی اُرش کُتگ بوتگ ات –

اے اُرش ءِ میان ءَ یک پولیس کارمند ءِ ھم مُرتگ، پولیس ءِ رِد ءَ پولیس کارمند ءِ مرگ چہ ایف سی ءِ کارمندانی ءِ تیر گواری ءِ سوب ءَ بوتگ –

تربت پولیس ءِ یک کارمندے ءَ گوں دی بلوچستان پوسٹ ءِ اھوالکار ءِ گوم ءَ تران کنان ءَ اے ھبر راست کُتگ ءُ گوشتگ کہ پولیس کارمند ءِ مرگ چہ ایف سی ءِ تیرگواری ءَ بوتگ –

پولیس کارمند ءِ رِد ءَ پولیس ءِ گاڑی دومی نیمگ ءَ کمے گستاء روگ ءَ بوتگ کہ ھنچوش کہ زالبول ءَ ایف سی ءِ سر ءَ پدائی اُرش کتگ گّڑا ایف سی ءِ کارمنداں پولیس ءِ گاڑی ءِ سر ءَ تیرگواری بندات کتگ چریشی ءَ یک کارمندے مرتگ ءُ دگہ زدگ بوتگ انت –

اے درگت ءَ گیشیں پوٹ ءُ پول ءَ پد وھدیکہ نادراھجاہ ءَ ھال کتگ گڑا نادراھجاھے واکدارانی رِد ءَ پولیس ءِ مرگ چہ تیر ءِ لگگ ءِ سوب ءَ بوتگ –