بلوچستان: دو ورنا یل بوتگ انت ، دگہ یکے زورانسری آوارجنی ءَ پد بیگواہ

سربوتگیں ھالانی رِد ءَ بلوچستان ءِ دمگ کیچ ءُ ھزدار ءَ پوج ءِ دست ءَ زورانسری آوار جنگ بوتگیں دو ورنا یل بوتگ انت وھدیکہ دگہ یک ورنایے زورانسری آوار جنی ءَ پد بیگواہ کنگ بوتگ –

گیشیں ھالانی رِد ءَ ھمے ماہ ءَ کیچ ءِ بنجاھی شھر تربت ءَ پاکستانی پوج ءِ دست ءَ زورانسری آوار جنگ بوتگیں چار ورنایانی تہ ءَ دو ورنا عبداللہ ء عبدالرحمن ءُ شَے مُرید ء مختار جھمنند زامران یل بوتگ ءُ وتی گس ءَ سر بوتگ انت –

ورنایانی یل بوگ ءِ ھبر آھانی کھولاں راست کُتگ وھدیکہ آھانی ھواری ءَ زورانسری آوار جنگ بوتگیں مسلم ء عارف ءُ فتح ء میعار ھنگت بیگواہ انت –

دومی نیمگ چہ ھزدار ءَ ھال آیگ انت کہ پاکستانی پوج ءَ عبدالوہاب کلندرانی زورانسری آوار جتگ ءُ بیگواہ کتگ –

کھول ءِ رِد ءَآ بولان کالونی ءَ آوار جنگ ءُ بیگواہ کنگ بوتگ، عبدالوہاب ھما وھد ءَ زورانسری آوار جنگ بوتگ کہ آ وتی کھول ءِ ھمراھی ءَ نادراھجاہ ءَ شتگ بوتگ کہ واتر وتی گس ءَ آیگ ءَ بوتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زورانسری آوار جنیانی درچ یکشل ءَ برجاہ انت – بلوچانی زورانسری آوارجنی ءِ بگیری ءَ ماں شال ءَ پریس کلب ءِ دیم ءَ وی بی ایم پی ءِ کمک سرکماش ماما قدیر بلوچ ءِ سروکی ءَ بنجل ءِ ھم جنگ بوتگ – ماما قدیر بلوچ ءِ رِد ءَ بلوچستان ءَ اے وھدی کساس پنجاہ ھزار ءَ گیش مردم پاکستانی پوج ءَ زورانسری آوار جتگ ءُ بیگواہ کتگ انت آھانی تہ ءَ کمے کساس ءَ مردم یل کنگ بوتگ ءُ بازینے ءِ ژانگولیں جون چگل دیگ بوتگ ءُ بازینے نیم ساری جاوراں یل کنگ بوتگ انت –