8 جون : بلوچستان ءَ زورانسری بیگواھیانی روچ
ٹی بی پی شونگال
سال دو ھزار ءَ سردار خیربخش مری ءِ دزگیری ءَ پد بلوچستان ءَ بلوچ راجی آجوئی ءِ جُنز ءِ بندات بلوچ لبریشن آرمی ءِ پلیٹ فارم ءَ چہ کنگ بیت۔ بلوچستان ءَ برجاھیں آجوئی ءِ جُنز ءِ ھلاس کنگ ءِ ھاتر ءَ پاکستان ءِ پوجی سرکار جنرل پرویز مشرف ءِ مستری ءَ زورانسری بیگواھیاں یک سلاھی ءِ پئیم ءَ کارمرز کنت ءُ پاکستان ءِ چیریں ادارگ آجوئی ءِ جُنز ءَ بندوکیں ادارگانی باسکاں زورانسری بیگواہ کنگ بندات کن اَنت، کہ ایشی ءِ بندات نورا مری ءِ زورانسری بیگواھی ءَ چہ کنگ بیت اِنت۔
پوجی زورشاھیں جنرل مشرف ءِ پوجی واکداری ءِ ھلاسی ءَ پد اوست دارگ بئیگ ءَ اَت کہ چہ بلوچستان ءَ زورانسری بیگواھیانی تہ ءَ کمی اتک کنت بلے دو ھزار ءُ ھشت ءَ پیپلز پارٹی ءِ سرکار ءَ پد ءَ بلوچستان ءَ زورانسری بیگواھیانی تہ ءَ گیشی اتک، اپریل دو ھزار ءُ نھ ءَ چہ تربت ءَ بلوچ نیشنل موومنٹ ءِ چیئرمین، غلام محمد بلوچ ءَ ھوار شیر محمد ءُ لالا منیر ءَ بلوچستان اسمبلی ءِ پیسرگیں اپوزیشن رھشون کچکول ایڈوکیٹ ءِ چیمبر ءَ چہ زورانسری بیگواہ کنگ بنت، چریشی ءَ لھتے روچ ءَ پد آیانی جون چہ تُربت ءَ لھتے کلومیٹر دیر، مرگاپ ءَ ژانگولیں جاورانی تہ ءَ دزکپ اَنت۔
بی این ایم ءِ چیئرمین ءِ زورانسری بیگواھی ءُ زندانی کُوش ءَ پد بلوچ سیاسی رھشون ءُ باسکاں ھوار زند ءِ ھمک تک ءَ سیاسی داروکیں مردمانی مزنیں کچے ءَ زورانسری بیگواھیانی یک درچے بندات بیت، کہ داں روچ ء مروچی برجاہ اِنت۔ 8 جون دو ھزار ءُ نھ ءَ بی ایس او ءِ وائس چیئرمین زاکر مجید چہ مستونگ ءَ زورانسری بیگواہ کنگ بیتگ ءُ 28 جون ءَ بی این ایم ءِ سنٹرل کمیٹی ءِ باسک ڈاکٹر دین محمد بلوچ چہ آئی نادراھجاہ ءَ زورانسری بیگواھی ءِ نشانگ کنگ بیت۔ بی ایس او ءِ پیسرگیں وائس چیئرمین سنگت ثناء ءُ بلوچ ریپبلکن پارٹی ءِ بنجاھی انفارمیشن سیکرٹری جلیل ریکی ءَ زورانسری بیگواھی ءَ پد کُشگ بنت ءُ آیانی لاش گیابان ءَ دور دیگ بنت اِنت۔
زورانسری بیگواھی ءَ پد کُشگ بیتگیں جلیل ریکی ءِ پِت ءُ گوستگیں پانزدہ سالاں چہ زورانسری بیگواھیں مردمانی یل کنائنگ ءِ ھاتر ءَ برجاھیں جد ءُ جھد ءِ چیدگیں رھشون ماما قدیر بلوچ ءِ رد ءَ چہ بلوچستان ءَ ھزارانی کچ ءَ مردم پاکستانی پوج ءِ دست ءَ زورانسری بیگواھی کنگ بیتگ اَنت ءُ دو ھزار ءَ گیش زورانسری بیگواہ کنگ بیتگیں مردم کُشگ بیتگ اَنت ءُ آیانی لاش جنگل ءُ گیاباناں دور دیگ بیتگ اَنت ءُ نوں یکشلی ءَ گوں زورانسری بیگواہ کُتگیں مردماں دروگیں میڑانی تہ ءَ کُشگ بئیگ ءَ اَنت۔
بلوچستان ءَ زورانسری بیگواھی ءَ یک مردمانی ھلاس بوگ ءِ ترسے ودی بیتگ ءُ بلوچ چاگرد ءِ ھمک تک سانمند اِنت۔ ھزارانی کھول زورانسری بیگواھیانی سوب ءَ زرکاری، زھنی ءُ چاگردی جنجالانی آماچ اَنت ءُ بلوچ مات ءُ گوھار وتی دوستیگانی یل کنائنگ ءِ ھاتر ءَ زھرشانی نندانک ءُ پریس کلبانی دیم ءَ یکشل ءَ زھرشانی کنگ ءَ اَنت۔ بلوچستان ءَ کہ ھمود ءَ پیسر ءَ چہ زورانسری بیگواھیں مردمانی ھاتر ءَ زھرشانی برجاہ اَنت، ھمود ءَ ھمک گوزوکیں روچ ءِ پجیگ ءَ زورانسری بیگواھیں مردمانی کساس ءَ گیشی آیان اِنت۔
بی ایس او آزاد ءَ دو ھزار ءُ شانزدہ ءَ ھشت جون گوں زورانسری بیگواھیں مردماں بندوک کُتگ اَت ءُ ھمے روچ ءَ سرجمیں بلوچستان ءَ زورانسری بیگواھیں مردمانی کھول ءُ مردمی اگبالانی گل زورانسری بیگواھیں مردمانی یل کنائنگ ءِ ھاتر ءَ پریس کلبانی دیم ءَ زھرشانی کن اَنت ءُ واکدارایں پاٹیاں ءُ پاکستانی پوج ءَ چہ وتی بیگواھیں دوستیگانی یل کنگ ءِ لوٹ ءَ کن اَنت۔
سرکاری ٹاہ، آمید گسی کمیشنانی پرمان ءُ مردمانی اگبالانی ھاتر ءَ کارکنوکیں گلانی دزبندیاں پد ھم بلوچستان ءَ برجاھیں زورانسری بیگواھیانی تہ ءَ کمی آیگ اگاں اوشت ءِ جاہ ءَ روچ پہ روچ گیشی آیان اِنت، کہ اے مردمی اگبالانی ءُ جمھوری وڑ ءُ پئیمانی ھلاپ ورزی اِنت، اے وئیلانی گِر ءُ دار ھژدری اِنت اگاں ناں گڑا اے مردمانی ھلاسی ءِ ترس ءَ گیش ودین ایت-