بساک ءِ بنجاھی لس مجلس ءُ آئی ءِ راجکاری ءِ ارزشت
نبشتہ کار: نبیل نود بلوچ
دی بلوچستان پوسٹ
اے گپ چو روچ ءَ سَھرا اِنت کہ بساک بلوچ نودربرانی ھما وھد ءَ رھشونی ءَ کنگ ءَ اِنت کہ بلوچ ورنا نوکری ءُ اسکالر شپانی نام ءِ سر ءَ مچانکی جُھد ءَ چہ سندگ ءُ زاتی زند ءِ تہ ءَ مان اڑینگ بئیگ ءَ انت، یک چاگردے ءَ کہ نودربرانی بستار ءُ ارزشت وتگڑیں میر ءُ واجھانی ستا ءُ ساڑا بہ بیت،اود ءَ راج ءُ زمین ءِ ارزشت تھنا کِسھَانی تہ ءَ پش کپ ایت۔بساک ءِ جُھد کہ بلوچ ورنایاں راج دوستی پَتّر ءِ سر ءَ یکجاہ کنگ ءُ آیاں اے باور کنائینگ ءَ اِنت کہ تئی مرچیگ تئی باندات اِنت، اگاں تو مرچی چہ زاتی پگر ءُ زند ءَ چہ در نہ کپت ئے سما ءُ سسّا نہ کُت تو باندا یک املے ءِ بھر جوڑ بوت نہ کن ئے ،ناں کہ ھستیں وھد ءِ اڑ ءُ جنجالاں چہ وتی راج ءِ دَر کنگ ءَ سوبین بیت کُت کن ئے۔
بساک ءِ سیمی بنجاھی لس مجلس گوں وتی وھد ءَ بوھگ اے گپ ءَ گیشین ایت کہ آ کجام کَساس ءَ داں وتی رھبندانی سر ءَ اوشتوک اِنت۔اے سیمی بنجاھی لس مجلس بلوچ راجکاری ءِ ھما دروازگانی پَچ کنگ ءِ توجیلے کہ لَب ءُ بیھارانی کُداماں گپتگ اَنت ءُ بند اَنت زوراکانی وتساچیں سمیسراں چہ ھما دیم بساک گوں راج دوستی لیکہ ءَ گوں اوشتوک اِنت ۔ اے گپ ءَ چہ کس بےزانگ نہ اِنت بساک ءَ کل بلوچ راج یک پَتّرے ءِ سر ءَ آورتگ ءُ یکجاہ کُتگ کہ مئے ھزار سالی دودمان ،زبان ءُ زمین ءَ وتگڑین کَشتگیں لکیر بھر ءُ بانگ کُرت نہ کناں۔ بلوچ ءِ درد بلوچ ءِ ارس ، آئی ءِ کَشتگیں لیکرانی دیم ءَ اوشتوک نہ بیت ۔
پہ بلوچ نودربرانی ھیلکاری ءَ بساک ءِ نیمگ ءَ چہ سے ماھی تاکبند نوشت ءِ یکشل ءَ چاپ ءُ شنگ کنگ جتا جتائیں سرھالانی سر ءَ بلوچی ءُ براھوئی زبان ءَ راجکاری لبزانک ءُ زبانانی ارزشت ءَ یک جُھدے کہ چرائی ءَ ورنا وتی چاگرد ءِ دیمروئی ءُ وتی دودمان ، وتی زبان ، ءُ زمین ءِ ارزشت ءَ شریں وڑے ءَ پَھم اَنت ءُ سرپد بنت ۔ آیانی دیمروئی ءُ رکینگ ءَ یک مچانکی املے جُنزینت کُت کن اَنت ۔نوشت ءِ ھمرائی ءَ گَل ءِ زھگانی تاک گام پہ زھگاں وتی زبان ءَ گوں مھر ءُ وانگ ءِ یک بنداتے کہ چرائی ءَ زھگ وتی ماتی زبان ءِ ارزشت ءُ بستار ءَ زاننت ءُ سرپد بنت۔مروچی گام ءِ تاک شھر شھر ، کوچگ کوچگ، لوگ لوگ ءَ رَوگ ءُ سر بوھگ ءَ اِنت اے پہ زبان ءُ زھگانی پکری ردوم ءَ یک جْوانیں مستاگے زانگ بیت اِنت۔
ھرچُنیں چاگردے ءَ مٹ ءُ بدلیانی آرگ ءَ نودربر گَلانی یک مزنیں بستار ءُ ارزشتے ھست اِنت۔ اگاں اود ءَ نودربر گَل راجی سما ءَ بے سما ءُ بے زانگ بہ باں گڈا آ چاگرد چو اوشاتگیں آپ ءِ پیم ءَ چیر ءَ شُنزُک بند ایت، راج دوستی لیکہ ءَ گوں بندوکیں گَل چاگردانی بے تواری ءَ پُروش اَنت آیاں دیما جنزگ ءِ توکل ءُ ھاٹیگ بَکشایاں۔ نودربر پہ چاگردے ءَ یک کسانیں درچکے ءِ پیم ءَ اَنت ھمینچو گیش آیاں سمبالے ءُ پھریزے دو ھمینچو آ وتی روتگاں زمین ءَ ایر دیاں ءُ بزیں ساھگ ءُ بَرانی دْرین ءَ زمین ءِ سارتُکیں دلبند ءَ تالان کن اَنت۔
بساک ءِ لٹریسی کمپئین پہ مئے چاگرد ءَ یک نوکیں رَبیت ءِ بنگیج کنگ بیتگ ، کہ اشی ءِ مول ءُ مراد ھمود ءَ کہ وانگجاہ نیست یا کہ وانگجاہ ھست ءُ آسراتی نیست گڑا واکداراں کڈن کنگ بیت اَنت کہ راج ءَ پہ وانگجاہ ءُ آسراتی دیگ ءَ وتی کرد ءَ پیلو بہ کن اَنت۔ اود ءَ کہ پہ وانگ ءَ بنکی آسراتی مہ بیت آ چاگرد ءِ گور ءَ جیڑگانی دَر کدی پچ نہ بنت۔ آ وھد ءُ جاورانی دنز ءُ مُجاں وتی زند ءَ پہ بے تواری گوازین اَنت کدی پہ وتی سرا بیتگیں جبر ءُ زورانی بابت ءَ نہ جیڑ اَنت ھچ پیمیں مٹ ءُ بدلی ءِ لوٹگ ءَ پہ وازمَنْدگ نہ بنت اِنت ۔
بساک ءِ رھبند ءِ تہ ءَ نودربرانی گور ءَ پٹ ءُ پولی سنچ ءُ بود ءَ ودینگ ءِ سرا انچش کہ زور دیگ بیتگ اَت ھمے پیما لٹریسی کمپئین مستریں نپ ءُ سیت اِش انت کہ نودربر پٹ ءُ پول کننت، پٹ ءُ پول ءَ چہ اے بیت کہ آ آیانی تہ ءَ چیزانی بابت ءَ پگر ءُ شوھاز کنگ ءِ سنچ ءُ بود وَد ایت ، انوگیں گلوبلائیزیشن دور ءَ سائنسی لوٹانی رِد ءَ پٹ ءُ پولی چیزانی سر ءَ بیسہ کنگ بیت ءُ آیاں ارزشت ءُ بستارے دیگ بیت اِنت ، پٹ ءُ پول کنگ ، گَل ءُ ایندگے کاراں مُھکم کنت ، ایردستیں راجانی گور ءَ پٹ ءُ پول ءِ ارزشت چی اِنت؟ اے کمپئین تہ ءَ ھرچ باسک ءَ را پابند کنگ بیتگ وتی دمگانی وانجگاھانی بابت ءَ پٹ ءُ پول بکن اَنت دانکے آیانی گور ءَ پٚٹ ءُ پول کنگ ئِے یک نوکیں درے پچ بہ بیت۔
انچش کہ ارنسٹ رینن راج ءِ بزانت ءِ گیشنگ ءِ بابت ءَ گْوش ایت” گْوَست ءَ یک مزنیں مڈی ءُ میراسے ھست ، اے میراس ءَ راجی بامردانی پَھر ءُ شان بندوک اَنت ھمے بامردانی یات ءُ شان ءِ سر ءَ لس مردم پَھر بند ایت۔راجی ھیال گوں گْوَست ءَ بندوک اَنت گْوَست ءِ تہ ءَ لس مردم چیزانی مُچ کنگ ءَ سوبین بیتگ اَنت کہ اشانی سوبمَنْدی ءِ بُن راجی بامرد زانگ بنت ، اگاں یک وھدے کربانی ءِ لوٹءَ بکنت گڑا لس مردم ءِ تہ ءَ کربانی دیگ ءِ جوزگ پھر ءُ شان بیت”
بزاں کہ راج ءِ بزانت ءِ گیشینگ ءَ یک پیلوے راجی بامردانی زانگ بیت ھمے پیم ءَ بساک ءَ وتی سیمی بنجاھی لس مجلس بلوچ راجی بامرد استاد سبا دَشْتیاری ءِ بْیاد ءَ کُتگ۔ یک چاگردے ءَ استادانی درورچو ھما کندیل ءِ پیما اِنت کہ آئی ءِ روشنائی ءَ گیابانانی تھاردیمیں کرگین روشنا بنت۔ واجہ سبا بلوچ لبزانک ءُ راجکاری ءَ پجارتگ ءُ منیتگ ایں نامے۔ کہ آئی ءِ یکشلیں جَد ءُ جھد پہ بلوچی لبزانک زمین ءُ راج ءَ مدام گیر آرگ بنت۔ھمے پیمیں استادانی ھونریچینانی مُز اِنت کہ بلوچ راجدپتر ءِ تاک دیم پھر ءُشانانی ستاھاں گوں نَکش ءُ گیرانک کنگ اَنت ۔ استاد سبا ءِ یاد ءَ بیوکیں بنجائی لس مجلس اے گواھی ءُ شبین ءَ دنت کہ بلوچ نودربر وتی استادانی کَشتگیں کشکانی سر ءَ گوں جوزگاں جنزان اَنت ۔ بساک گَل ءَ یک کسانیں وھدے ءَ بلوچ نودربرانی گور ءَ یک مھکمیں بستار ءُ ارزشتے پہ وت ءَ گیپتگ۔ آئی ءِ کارانی وڑ ءُ پیم بہ باں کہ آئی ھیلکاری گیردانک یہ کہ دیوان درست پہ شریں وڑے ءَ بلوچ چاگرد ءَ مَنّگ ءُ ساڑایگ بنت۔ لس مھلوک ءِ دلانی تہ ءَ آئی ءَ پہ وت جتائیں جاہ ءُ ھندے گپتگ کہ لس مھلوک چرائی ءَ چہ باز اُمیت دار ایت ءُ سیمی بنجاھی لس مجلس ءَ بلوچ راجکاری ءُ بلوچ چاگرد ءَ جْوانیں مٹ ءُ بدلیانی واھگ درشان کنگ بوھگ ءَ اِنت ۔ اُمیت اِنت کہ آھوکیں لس مجلس چو یک بامسارے ءَ گوں نوکیں اوست ءُ امیتاں گوں ٹِک دنت ءُ بلوچ نودربرانی ءُ چاگرد ءِ وابانی پَریچگ ءَ یک وشیں سھبے ءِ مانزمان بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔