ھاران ءُ پنجگور ءَ بمب اُرشانی زمہ واری بی ایل اے ءَ منّ اِتگ اَنت

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگ گْوشتگ کہ بی ایل اے ءِ سرمچاراں ھاران ءُ پنجگور ءِ دو جتائیں دستی بمب اُرشاں زورگریں پاکستانی پوج ءُ آئی ءِ ھم بھریں ادارہ سی ٹی ڈی نشانگ کتگ، اُرشاں یک دُژمنیں کارندہ مرتگ وھدے کہ دُژمن ءَ گیش جانی تاوان چست کنگ کپتگ-

آئی ءَ گْوشتگ کہ بی ایل اے ءِ سرمچاراں گوستگیں شپ ءَ ھاران شھر ڈپٹی کمشنر ءِ کارگس نزیک ءَ برجاھیں سی ٹی ڈی ءِ کارگس یک دستی بمبے ءَ گوں نشانگ کتگ، تراک ءِ آسر ءَ دُژمنیں کارندھاں جانی ءُ مالی تاوان چست کنگ کپتگ-

جارکش ءَ گْوشتگ کہ بی ایل اے ءِ سرمچاراں نوزدہ مئی 2023 ءِ شپ ءَ پنجگور شھر ءَ کلم چوک سر ءَ برجاھیں زورگریں پاکستانی پوج ءِ چوکی گوں دستی بمب ءَ نشانگ کتگ، تراک ءَ چوکی ءِ تہ ءَ ساڑی ئیں دُژمنیں کارندہ ھما دمان ءَ مرتگ-

ُگُڈی ءَ آئی ءَ گْوشتگ کہ بلوچ لبریشن آرمی اے اُرشانی زمہ واری ءَ منّ اِیت- زورگریں پاکستانی پوج ءِ سرجمی ءَ دراھگ ءَ تاں مئے اُرش برجاہ بنت-