بلوچ نودربر گل آزاد ءِ بیست ءُ سیمی بنجاھی لس مجلس ءِ دومی روچ

چوشیں جاوراں بلوچ راھشوناں لوٹ ایت کہ آ دری کاری (سفارت کاری) ءَ را یورپی بنجاہ ءَ دارگ ءِ بدل ءَ آئی ءَ را سرجمیں جھان ءَ سرکنگ ءِ جھد ءَ بہ کن انت- کونسلران

بلوچ نودربر گل آزاد (BSO Azad) بیست ءُ سیمی بنجاھی لس مجلس ءِ نیاد بیاد لمہ ء وتن بانک کریمہ بلوچ ءُ بلوچ نمیران ءُ بنام بیگواھیں بلوچانی یات ءَ مروچی دومی روچ برجاہ دارگ بوتگ ءُ مروچی بزاں ھژدہ اپریل سَے شمبے ءِ روچ ءَ بلوچ نمیرانانی یات ءَ دو دمان ءِ بے تواری ءُ گوں گل ءِ بنجاھی لس مجلس ءِ نیاد بندات کنگ بوتگ –

بلوچ نودربر گل آزاد ءِ بنجاھی جارکش ءَ ماں رسانکدراں وتی شنگ کرتگیں درشان ءِ تہ ءَ مروچی لس مجلس ءِ سرجمیں ھال شنگ کُتگ ءُ گوشتگ کہ بی ایس او آزاد ءِ بیست ءُ سیمی بنجاھی لس مجلس ءَ ھشت بنگپانی (ایجنڈا) سرا تران بیت اِنت کہ ایشانی تہ ءَ بنجاھی سرکماش ءِ تران، آئین سازی، کارگشاد ءِ اھوال، نگدی نشست، گَل کاری ، دمگی ءُ میان استمانی سیاسی جاورھال ءُ آؤکیں گامگیج، گچینکاری ءُ سرکماش ءِ گُڑی تران ھوار اَنت –

جارکش ءَ گوشتگ کہ چوشکہ ھبدہ اپریل ءَ دو شمبے ءِ روچ ءَ دیوان ءِ اولی روچ ءَ سرکماش ءِ تران، آئین سازی، کارگشاد اھوال ءُ نگدی نشست ءِ بنگپانی سر ءَ پیسری روچ ءِ شنگ بوتگیں باوستاں گوں دیوان آسر بوتگ ات ءُ مرچی بزاں ھژدہ اپریل ءَ سَے شمبے ءِ روچ ءَ بنجاھی لس مجلس ءِ دومی روچ ءَ گل کاری، دمگی ءُ میان استمانی سیاسی جاورھال ءُ آؤکیں گامگیج ءِ بنگپانی سر ءَ گوں دلجمیءَ باوست کنگ بوتگ کہ اود ءَ (ڈسکیشن ءَ) دیوان ءِ کلیں کونسلراں بھر زرتگ ءُ پہ گل ءِ کار ءُ پروگرامانی درگت ءَ وتی شور ءُ سَلاہ داتگ انت –

جارکش ءَ گوشتگ کہ چو مدامی ئیں وڈا مرچی ئیں دیوان ءِ بندات اوں چہ بلوچ نمیرانانی یات ءَ دو دمان ءِ بے تواری ءَ بندات کنگ بوتگ ءُ دیوان ءِ پنچمی بنگپ تنظیمی امور بوتگ کہ آ دو بھرانی تہ ءَ بوتگ۔ بنگپ ءِ اولی بھر ءَ کونسلراں وتی تاک ونتگ انت کہ اے تاک (پیپر) آھاں بنجاھی کارگشاد ءِ گشگ ءِ پد ءَ چہ پیسر ءَ نبشتہ کتگ ات انت ءُ اے بنگپ ءِ دومی بھر ءَ اولی بھ رءِ پیش کتگیں گپ ءُ تران ءُ سِلاہ ءُ شورانی سر ءَ گیشیں باوست کنگ بوتگ –

آئی ءَ گوشتگ کہ بنجاھی لس مجلس ءِ ششمی سرھال دمگی ءُ میاں استمانی سیاسی جاورھال ءِ سر ءَ بوتگ کہ آئی ءِ تہ ءَ کونسلراں ھمے بنگپ ءِ سر ءَ وتی نبشتگیں تاک ونتگ انت –

دیوان ءِ سنگتاں تران کنان ءَ گشتگ کہ میاں استمانی سیاست ھمک روچ ءِ بنیاد ءَ چہ بدلی ءِ امل ءَ سپر کنان انت ءُ اے درچ ءَ انچو گمان بوان انت کہ روس ءُ یوکرین ءِ جنگ ءَ رند میان استمانی سیاست ءِ ندارگ آوکیں چندے مدتانی نیام ءَ بدل بوت کنت – گوستگیں یک کرنے ءِ ویل پمّے واستہ سرپد یا چار ءُ بیچار ءِ ھاتر ءَ بس انت کہ میان استمانی سیاست ءِ تہ ءَ ھچ پیمیں رھبند، لیکہ ءُ پائیدگ ابدی نہ بنت بگندئے گوں وھد ءِ ھمبرائی ءَ آھانی تہ ءَ مٹی ءُ بدلی کیت انت۔ ھما امریکہ کہ آئی ءَ تالبان ھوار سرجمیں جھان ءَ ھاسکر میانی ایشیا ءَ سویت یونین ءِ ھلاپ ءَ اسلامی گل مھکم کتگ ات، آھاناں نوک نوکیں سِلاہ دات ءُ سیاسی ءَ مالی بستار ءَ آھانی سک باز کمک کت ءُ رند ءَ وتی بندپتری مستریں جنگ اوں ھمیشانی ھلاپ ءَ کت ءُ در کپت – ھمے ڈول ءَ یک منّگ نامہ یے مارا ھما وھد ءِ سویت یونین ءُ نیٹو بزانکہ امریکہ ءِ میان ءَ دیم ءَ کیت وھدے کہ آھاں جرمنی ءِ یکجاھی ءِ سر ءَ پیسلہ کت کہ اود ءَ امریکہ ءِ سَرپان ءَ سویت یونین بزانکہ روسی فیڈریشن ءَ را دلجمیں بیسہ دات کہ امریکہ نیٹو ءَ را چہ جرمنی ءَ دیم نہ بارت انت بلے سویت یونین ءِ پرشگ ءَ رند امریکہ ءَ نیٹو ءَ را سرجمیں یورپ ءَ سر کت، آئی ءَ بالٹک نیشنزاں ھوار یوکرین کہ آئی ءِ مزنیں سیمسری بھرے گوں روس ءَ انت، آئی ءَ را ھم باسکی زورگ ءِ پلہ مرزی کت کہ ایشی ءِ سوب ءَ روس ءُ یوکرین ءِ میان ءَ جنگ پاد اتک کہ اے جنگ جھانی دنیا ءَ مدام بدلیانی سوب جوڑ بوان انت – ھمے ڈولیں درور مارا چہ سعودی عرب ءِ نیمگ ءَ گندگ ءَ پیداک انت، وھدے کہ عراق ءَ کویت ءِ سر ءَ ارش کت ءُ تاں دو روچاں آئی ءِ سر ءَ وتی ارش جَم داشت گڑا سعودی ءَ چہ وتی ترس ءَ سعودی عرب ءِ تہ ءَ “سیکورٹی گارنٹی” ءِ پالیسیانی بستار ءَ جتائیں پوجی اڈا دات، بلے استیں جاورالانی چار ءُ بیچارءَ گوما آئی ءَ وتی گواتانی دیم تاب داتگ انت ءُ چین، روس ءُ ایرانءِ ڈولیں امریکی دژمنیں ملک ءِ ھمبرائی ءَ وتی سیادیاں گھتر کنان انت، کہ اے جاور اے گپ ءِ منانک ءَ دینت کہ میاں استمانی سیاست ءِ میان ءَ ھچ پیمیں لیکہ اولی ءُ آسری بوت نہ کنت –

آھاں دیمتر ءَ گوشتگ کہ اے جاورھال تھنا میانی ایشیا ءِ نہ انت کہ اود ءَ امریکہ ءُ یورپ ءِ ھلاپ ھیال دیم ءَ پیداک انت بگندئے ساوتھ ایشیا ءَ ھوار ایشیا ءُ اپریکہ ءِ ڈولیں دمگ دمگاں اوں روایرکپت سینٹرک ورلڑ آرڈر ءِ ھلاپ ءَ توار چست بوان انت، یوکرین ءُ روس ءِ جیڑھاں پد یورپی ملکاں ابید گیشتر ملکاں روایرکپت ءِ ھمسنتی ءَ چہ انکار کت۔ ہندوستانی دری کارانی وزیر ءَ وتی یک گلگدارے ءِ تہ ءَ گشتگ ات کہ یورپ ءَ نوں چرے پکر ءَ درآیگی انت کہ “دنیا ءِ جیڑہ مئے جیڑہ نہ انت ءُ مئے جیڑہ دنیا ءِ جیڑہ انت۔” مرچی ھمے جاورھال میانی ایشیا ءُ خلیجی ملکانی نیمگ ءَ ھم گندگ پیداک انت کہ اود ءَ امریکہ ءِ پوجی اڈہ ھست انت ءُ دومی نیمگ ءَ چہ عرب ملکانی نیمگ ءَ ھمے زوتاں عراق ءُ ایران ءُ روس نواز سرکار ءِ گوما شریں سیادی ءُ اپریکہ ءِ ملکانی چین ءِ نیمگ ءَ آیگ میان استمانی سیاست ءِ دروشم مٹ کتگ- عرب ملک ءُ میانی ایشیا ءَ سعودی عرب ءِ ڈولیں مسلمانیں ملکانی نیمگ ءَ انچوش کہ انفراسٹرکچر، سیل ءُ سواد، گوازی ءُ مردمی ھکاناں ارزشت دیگ بوگ ءَ انت، اے چیز آؤکیں وھداں پورپ ءَ جتائی ءِ سوب جوڑ بنت، کہ ایشی ءِ درور گتر وڈیں مسلمانی ملکے ءَ فیفا ورلڈکپ ءِ اڈّ دیگ انت –

آھاں گوشت کہ بوت کنت اے راستی ءِ رد کنگ ھشکیں ھیالے کہ چہ سرجمیں دنیا ءَ امریکہ ءُ یورپ ءِ دزرس ءِ اینکس زوتاں ھلاسی کسانیں مدتے ءِ تہ ءَ چون بوت کنت ، بلے اے گُمان رد کنگ نہ بیت کہ اے وھداں ھرچ بدلی یے کہ آھان انت چرایاں اے گمان بوت کنت کہ جتائیں دمگاں ساڑی ئیں تاکت چہ امریکہ ءُ یورپ ءِ ساھگ ءَ در بیا انت ءُ وتی جیڑہانی تہ ءَ وت آزاد ءُ وتواکیں تاکتے بہ دار انت۔ روس ءُ ہندوستانی (انڈیا) دری کارانی وزیر ءِ میان ءَ بووکیں یک گند ءُ نندے ءَ گشت دنیا چہ یونی پولر ورلڈ آرڈرءِ بدلءَ پولی سینٹرک ورلڈ آرڈر ءِ نیمگ ءَ بہ روت انت، کہ ایشی ءِ بزانت ھمیش انت کہ ھرچ دمگے ءِ وتی یک جتائیں تاکت ءُ بنجاھے بیت کہ چریشی ءَ سرجمیں جہان ءَ تاکت ءِ مھار تھنا یک استانے ءِ دست ءَ نہ بیت بگندئے ھمک دمگ ءَ یک جتائیں بنجاھی تاکت ءُ پیسلہ ساز یءِ بنجاھے جوڑ بیت۔ بزانکہ چہ امریکہ ءُ یورپ ءِ ساھگ ءِ چیر ءِ بد لءَ اپریکہ، ساؤتھ ایشیا، میانی ایشیا ءُ ھوار کلیں دمگ وتی یک بنجاھی تاکتے دیم ءَ آرگ لوٹ انت کہ چہ اود ءَ آ وتی دمگی جیڑہ ءُ جنجالاں گیش ءُ گیوار بہ کن انت چیا کہ روایرکپت سینٹرک ورلڈ آرڈر سرجمیں دنیاءَ ودی بووکیں جیڑھانی توجیل سازی ءَ سرجم بے سوب بوتگ ءُ بازیں دمگاں وت جنگ ءُ مزنیں جیڑھانی آرگ ءِ مانزمان بوتگ –

کونسلراں میان استمانی سیاست ءِ بدل بوگ ءِ بنیاد ءَ بلوچ درکاری (سفارتکاری) ءِ سرءَ گپ ءُ تران کت ءُ گشت کہ ھرچونیں راجی آجوئی ءِ جہدےءِ ھاتر ءَ دری کاریءِ عمل باز ارزشت دار انت، ھداں بلوچ ءِ درکاری (سفارتکاری) ءِ بنجاہ یورپ نہ انت بگندئے میانی ایشیا ات ءُ عراق ءِ وڈیں ملکاں بلوچ سیاسی جھدکار نشت انت ءُ وتی روتاک ءُ ایدگہ سیاسی چست ءُ ایر برجاہ داشت انت، ءُ آ وھد ءِ میان استمانی سیاسی لوٹانی بنیاد ءَ بلوچانی میان ءَ امریکہ ءُ یورپ ءِ ھلاپ پکر ءُ ھیالے ھست ات، بلے 2000 ءَ رند سر چست کنوکیں بلوچ راجی جنز ءِ وھد ءَ دنیا ءِ جاور مٹ ات انت، یورپ ءَ مردم گری ءُ مردمی ھکانی تاج سر ءَ ات کہ آئی ءِ سوب ءَ بلوچ سیاسی جہدکار یورپ ءَ شت انت ءُ جنز ءِ چست ءُ ایر بنا کت انت ءُ مرچی ما گند ایں کہ میان استمانی چست ءُ ایر پدا مٹ بوان انت، پمیشکہ چوشیں جاوراں بلوچ راھشوناں لوٹ ایت کہ آ دری کاریءَ را یورپی بنجاہءَ دارگءِ بدلءَ آئی ءَ را سرجمیں جھان ءَ سرکنگ ءِ جھد ءَ بہ کن انت تاکہ آؤکیں وھداں ھر چونیں مزنیں مٹ بووکیں بدلیاں چہ بلوچ راجی جنز تاوان بار بوگ ءِ بدل ءَ چہ ھما جاوراں پائیدگ چست بہ کنت کہ آ پائیدگ جنز ءِ مھکمی ءُ سوبمندی ءِ مانزمان بہ بنت –

کونسلراں دمگی سیاسی جاورھالانی سر ءَ وتی ھیال درشان کت انت ءُ گشت کہ زورگریں پاکستان ءِ نیمگ ءَ ھمک روچ ءِ بنیاد ءَ بلوچ ورنایانی زورانسری گار ءُ بیگواھی، سی ٹی ڈی ءِ دستاں فیک انکاونٹر ءُ زانگولیں جونانی دور دیگءِ درچ برجاہ انت ءُ ھمد ءَ ھمک روچ ءِ بنیاد ءَ بلوچ زالبول استان ءِ زلمانی آماچ انت کہ ایش بلوچ راجمان ءِ ترس ءِ پیداک کنگ ءِ یک دگہ بے سوبیں کوشستے – ایشانی ھمبرائی ءَ ما گند ایں کہ وانگی بستار ءَ کمیشن کلچر گیش شاھگان کنگ بوگ ءَ انت، استانی شوربندی ءِ بنیاد ءَ مذہبی شدت پسندی ءَ گیش توان دیگ ءُ پرائیوٹ وانگجاھاں یک ھاسیں پندلے ءِ گوما جنز ءِ ھلاپ ءَ کارمرزگ، جتائیں این جی اوزاں بلوچ ڈیھ ءَ دیم ءَ آرگ، چہ بلوچ ءِ منشا ءَ ابید درملکی لٹ ءُ پلی زرداراں بلوچستان ءَ آرگ، سافٹ تاکت ءِ وسیلہ ءَ مھلوک ءَ چہ جنز ءَ دلپروش کنگ ءِ جھد کنگ ءُ جنز ءِ بارو ءَ نام نھادیں پارٹیانی وسیلہ ءَ مھلوک ءِ تہ ءَ دلپروشی آرگ ءِ کوشست ءُ رد آشوبی تاکتانی ھاتر ءَ میدان ءَ جوڑ کنگ، اے دراھیں جھد ءُ کوشستانی مکسد بلوچستان ءَ وتی کبزہ ءَ را گیش مھکم کنگ انت – اے استانی پالیسیانی مکابلہ کنگ استیں وھد ءَ راجی جنز ءِ ھاسیں دلگوشانی تہ ءَ بہ بنت –

بنجاھی جارکش ءَ وتی درشان ءِ تہ ءَ گوشتگ کہ ششمی بنگپ ءِ ھلاس بوگ ءَ پد کارگشاد ءِ نیمگ ءَ آوکیں گامگیج ءِ بنگپ ءَ تنظیمی کونسلرانی نیمگ ءَ آوکیں دو سالی پروگرامانی ھاتر ءَ داتگیں شور ءُ سلاہ دیوان ءِ دیم ءَ یک یک ءَ ایر کنگ بوتگ انت کہ آھانی سر ءَ کونسلرانی میان ءَ دلجمی باوست بوگ ءَ رند راجی جنز ءُ بی ایس او آزاد ءَ را گیش مھکم ءُ شاھگان کنگ ءِ ھاتر ءَ کونسلرانی گیشتری بھر ءِ منگ نامھانی پد ءَ لھتیں ھاس ءُ پرارزشتداریں پیسلہ زورگ بوتگ انت ءُ وھد ءُ جاورانی چار ءُ بیچار ءِ بنیاد ءَ بنجاھی لس مجلس ءِ ششمی بنگپ ءِ دومی بھر گچینکاری، سوگندی دیوان ءُ کماش ءِ گڑی تران پہ دیمی روچ ءِ ھاتر ءَ مھتل داشتگ انت-