بلوچستان ءِ دمگ بولان ءَ پاکستانی پوج ءِ لشکر کشی برجاہ، زامران بازیں کچے ءَ پوج آیگ لشکر کشی ءِ گمان
بولان ءُ سبی ءِ ھند ءُ دمگاں مروچی ھپتمی روچ ءَ ھم پاکستانی پوج ھِ لشکر کشی برجاہ بوتگ، دمگ ءِ تہ ءَ یکشل ءَ پوج ءِ جنگی بالگرد ءُ بالگرد ترگ انت وھدیکہ بازیں راہ ءُ در پوج ءَ بند کُتگ ءُ نشتگ –
دمگی اھوالکارانی رِد ءَ مچ، آب گم، گونی پرا، سارو، شیر کنڈ ءُ ایندگہ کش ءُ.کری ھند ءُ دمگ ءَ لشکر کشی ءِ زد ءَ انت وھدیکہ بازیں ھند ءُ دمگاں مرچی ھم دامگ بند بوتگ انت –
گوستگیں روچ ءَ لشکر کشی ءِ میان گلہ ءِ کشت ءُ کشاری کنوکیں یک کھول آوار جنی ھال اتکگ ات کہ دامگ ءِ نہ بوگ ءِ سوب ءَ آھانی درگت ءَ ھچ وڈیں ھال نیست انت -.
دمگی اھوالکارانی رِد ءَ ھپت روچاں برجاھیں لشکر کشی ءِ سوب ءَ وردنی مڈی ھلاس بوگ ءَ ھوار نادراھ بازیں جیڑہ ءُ جنجالانی دیمپانی ءَ کنگ ءَ انت -.
دمگی واکداراں پوجی لشکر کشی ءِ درگت ءَ ھچ وڈیں درشان نہ داتگ – گوستگیں روچ ءَ آئی ایس پی آر ءَ سبی ءَ لشکر کشی ءِ وھد ءَ سلاہ بندیں مردمے ءِ جنگ ءِ ٹاہ داتگ ات ـ بلے تنی وھدی اے درگت ءَ ھچ وڈیں گیشیں سرپدی نہ رستگ -.
دومی نیمگ ءَ زامران ءِ دمگ جالگی ءُ نیوانو ءَ مروچی دومی روچ ءَ ھم مزنیں پوج ءِ اتکگ ـ دمگی اھوالکار ءِ رِد ءَ مزنیں کچے ءَ پوج ءِ آیگ ءَ ھمے گمان کنگ بیت کہ مزنیں لشکر کشی ءِ بیت انت –