بلوچستان ءَ زورانسری بیگواھیانی بگیرءَ وائس فار بلوچ مسنگ پرسنز ءِ مستری ءَ برجاھیں دراج پندیں زھرشانی بنجل ءَ مروچی 5012 روچ سرجم بیتگ اَنت- دومی نیمگ ءَ گوستگیں سال ءَ چہ کلات ءَ بیگواہ بیتگیں ورناھے مروچی یل بیتگ ءُ وتی لوگ ءَ سر بیتگ۔
محمد امین مگسی ایڈووکیٹ، صدام بلوچ ایڈووکیٹ ءُ عمران میروانی ایڈووکیٹ ءَ زھرشانی بنجل ءَ اتکگ ءُ بیگواھیں مردمانی کھولاں گوں یکجاھی درشان اِتگ۔
بنجل ءَ اتکگیں مردماں گوں تران کنان ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ بلوچ راج ءِ سرءَ گوزوکیں گم ءُ درد ءِ بوت کنت کس گمان ھم کُت مہ کنت اے جاورانی گندگ ءَ دل ھون ءِ ارس شلیت بلے بلوچ مزنیں جگر داریت ءُ آ اے درستیں ترندی ءُ سکیں جاوراں دل ءِ تہءَ کل کن اَنت ءُ ابید ءِ یک ترمپ ءِ ارس شلگءَ سگگ ءَ اَنت۔
ماما قدیر بلوچ ءَ گُشتگ کہ مئے اوپار ءُ برداشت ءِ پُشت ءَ لھتیں مردم گوں مئے کاز ءِ نام ءَ باپار کنگ لوٹگ ءَ اَنت بلے راجدپتر کس ءَ پھل نہ کنت۔
آئی ءَ گُشتگ گوستگیں لھتیں روچاں چہ بولان ءُ مکران ءِ جتاھیں ھندانی تہءَ پوجی بیڑ برجاہ اَنت کہ چہ آودہ تاوانانی اھوال ھم پیداک اَنت وھدیکہ دو روچ پیسر کراچی ءِ بلوچ دمگ لیاری ءَ چہ سئے بلوچ ورناہ پاکستانی لشکریاں دزگیری ءَ پد بیگواہ کُتگ اَنت ءُ پدءَ پولیس ءَ رسانک تران کنان ءَ آیانی سرءَ دروگیں بھتام جتگ اَنت آئی ءَ گُشتگ کہ گندگ ءَ پیداک اِنت کہ نوں پولیس ءُ رینجرز ءَ دیما آرگ بئیگ ءَ اِنت۔
دومی نیمگ ءَ دی بلوچستان پوسٹ اھوال پتر ءَ چہ کلات ءَ سر بیتگیں اھوالانی رد ءَ گوستگیں سال ءَ 22 اکتوبر ءَ چہ بلوچستانءِ قلات دمگ ءَ چہ زورانسری بیگواہ بیتگیں ولی اللہ لہڑی یل بیتگ ءُ لوگ ءَ سربیتگ۔
زانگ بہ بیت کہ بیگواھیں مردمانی کھولانی گل وائس فار بلوچ مسنگ پرسنز ءِ ردءَ بلوچستان ءِ جتاھیں ھند ءُ دمگانی تہءَ پاکستانی لشکری ھمک روچ مردماں دزگیر کنگ ءَ پد زورانسری بیگواہ کنگ ءَ اَنت البت لھتیں مردمانی یل کنگ ءَ دگہ گیشتر مردم بیگواہ کنگ بنت اِنت۔