گوانتانامبوے ءُ ابوغریب پاکستانی زندانانی دیم ءَ ھچ نہ انت – ماما قدیر بلوچ

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ سَے روچ سرجم بوتگ انت – مروچی نیشنل پاٹی ءِ رھشون حاجی نیاز لانگو، ماما عبدالغفار قمبرانی ءَ ھوار دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ 1948 ءَ وھدیکہ بلوچ سرڈگار ءِ سر ءَ پہ زور کبزہ کنگ بوتگ، ھما روچ ءَ بگر تاں روچ مروچی ریاستی ادارہ ءُ آھاں گوں ھواریں وتگڑیں جمہوریت لوٹوکاں بلوچ ءِ چکچینی ءُ ڈیھے لٹ ءُ پل برجاہ داشتگ انت – بلے بلوچاں مدامی اے زوراکانی بگیری ءَ گھگیری ءِ راہ گچین کتگ ءُ وشنام بوتگ انت –

“بلوچ جھد ءِ تہ ءَ ھزاراں پرزند نمیران بوتگ انت ءُ ھزارانی کچ ءَ زورانسری آوار جنگ ءُ بیگواہ کنگ بوتگ انت کہ آھانی تہ ءَ کماش، زھگ ءُ زالبول ھم ھوار انت “

آئی ءَ دیمتر ءَ گوشتگ کہ پاکستان ءِ زندانانی تہ ءِ زلم ءُ زوراکیاں گوانتاناموبے ءُ ابوغریب ءِ سیاھیں گوستانک ھم شرمندگ کتگ –