بلوچستان شھدربرجاہ ءِ مالی جاور نگیگ، دومی روچ ءَ ھم زھرشانی برجاہ

بلوچستان شھدربرجاہ ءَ یک رندے پدا مالی جاور نگیگ بوتگ انت، ماسٹر، کار کنوک ءُ شھدربرجاہ ءِ اپسرانی ءِ یکجاھیں ایکشن کمیٹی ءَ درسیں زانشتی ادارہ بند کتگ ءُ چکاس بائیکاٹ کتگ ءُ مروچی دومی روچ ءَ ھم زھرشانی کنگ بوتگ –

ایکشن کمیٹی ءَ ھواریں ماسٹرانی نمائندہ گل اکیڈمک سٹاف ایسوسی ایشن، یونیورسٹی آفیسرز ایسوسی ایشن ءُ بلوچستان شھدربرجاہ ءِ ایمپلائنز یونین ءَ شھدربرجاہ ءِ ٹرانسپورٹ ءَ ھوار درسیں ادارھانی کارگس بند کتگ ءُ سیاھیں بیرک جتگ –

ایکشن کمیٹی ءِ رِد ءَ شھدربرجاہ ءِ ماسٹر ءُ کارداراں دو ماہ انت کہ تنخواہ رسگ ءَ نہ انت، تنخواھانی رسگ، داشتگیں پروموشن، آپ گریڈیشن، ٹائم اسکیل کیسز، یونیورسٹیز ایکٹ ءِ تہ ءَ ترمیم، شھدربرجاہ ءِ باڈیز ایسوسی ایشن ءِ نمائندگانی جیڑہ ءِ سر ءَ جوائنٹ ایکشن کمیٹی ءِ چیردستی ءَ وائس چانسلر ءِ کارگس ءِ دپ ءَ بگر تاں شھدربرجاہ ءِ بنجاھی گیٹ ءَ روانک ءِ کش اِتگ –

درنگاز کنوکاں وائس چانسلر ءِ درکنگ ءُ تنخواھانی بند کنگ ءِ بگیری ءَ نارہ ءَ جتگ –

ایکشن کمیٹی ءِ رھشون ڈاکٹر کلیم اللی، نزیر اد لہڑی، شاہ علی بگٹی ءَ تران کنان ءَ گوشتگ کہ زھرشانی دراجکش دیگ بیت ءُ اشی ءَ ھوار درسیں کارگس، چکاس ، کلاس ءُ ٹرانسپورٹ سرجمی بند کنگ بنت تانکہ مئے لوٹ منگ نہ بنت –

” ہائیر ایجوکیشن کمیشن ءَ زانت ءَ زانشت ءِ فنڈ ھم کٹ کتگ انت ھمے وڈ بنجاھی سرکار بلوچستان ءَ پہ چار ارب کلدار ءِ گرانٹ ءِ بہ دنت تانکہ اے رمزان ءِ وشیں ماہ ءَ ماسٹر چہ ماژگی ازیت ءَ بہ رکّ انت ءُ وانگ ءُ زانگ ءِ کاراں دوبر دلگوش بہ بنت –