لکی مروت: بمب تراکے ءَ ڈی ایس پی ءَ ھوار چار کارندہ کُشگ ءُ شش زدگ بیتگ انت، زمہ واری ٹی ٹی پی ءَ من اتگ

خیبر پختونخواہ ءِ دمگ لکی مروت ءَ تھانا صدر ءِ نزیک ءَ تراکے ءِ آسر ءَ ڈی ایس پی اقبال مھمند ءَ ھوار چار کارندہ کُشگ بیتگ اَنت- اُرش ءِ زمہ واری تحریک طالبان پاکستان ءَ من اتگ-

پولیس ءِ رد ءَ ڈی ایس پی تھانا صدر ءِ سر ءَ اُرش ءِ ھال ءِ سر بوگ ءَ رھادگ بوتگ اِنت بلے پیر والا موڑ ءِ نزیک ءَ ڈی ایس پی ءِ گاڑی تراکناکیں شوروانی گون ءَ نشانگ کنگ بیتگ –

تراک ءِ آسرا ڈی ایس پی اقبال مھمند ءَ ھوار چار کارندہ کُشگ بیتگ اَنت ءُ شش زدگ کنگ بیتگ اَنت-

جارکش پولیس ءِ رد ءَ کُشگ بیتگیں کارندھانی توک ءَ کرامت، وقار، علہ مرجان، زدگ بیتگیناں ھیدکانسٹیبل فاروق، کانسٹیبپ گلتیاز، اصغر، امانت اللہ، عارف، سردار علی ھوار اَنت-

پولیس ءِ رد ءَ چریشی ءَ پیش سلاہ بندیں مردماں تھانہ صدر ءَ اُرش کرتگ ءُ اُرش ءَ پد تتکگ اَنت، جارکش پولیس ءِ رد ءَ پولیس ءِ بازین کارندہ وئیل جاہ ءَ سر بیتگ ءُ دمگ ءَ پٹ ءُ پول کنگ ءَ اَنت-