بلوچستان: چار مردم زورانسری آوار جنی ءَ پد بیگواہ، دو یل بوتگ انت

سربوتگیں ھالانی چہ ھاران ءَ چار مردم زورانسری آوار جنی ءَ پد بیگواہ کنگ بوتگ انت –

گیشیں ھالانی رِد ءَ ھاران ءِ دمگ کلی بنگلزئی ءَ پاکستانی پوج ءَ بازیں گِسانی سر ءَ بیڑ برتگ ءُ چار مردم آوار جتگ انت –

چم دیستیں گواھانی رِد ءَ زیکیں روچ ءِ ادار دو ءِ نزیک ءَ پاکستانی پوج ءَ ھاران ءِ دمگ کلی بنگلزئی ءَ بیڑ برتگ ءُ سرجمیں دمگ وتی انگیر ءَ کتگ بازیں گِس ءِ تہ ءَ پٹ پول کتگ ءُ ھمے میان ءَ چار مردم زورانسری آوار جتگ ءُ گوں وت برتگ انت –

آوار جنگ بوتگیں مردمانی پجار عطاء اللہ بنگلزئی ء علی محمد بنگلزئی، غلام محمد بنگلزئی ء علی محمد، امیر حمزہ بنگلزئی ء نصیر احمد بنگلزئی ءُ امان اللہ بنگلزئی ء نصیر احمد بنگلزئی ءِ ناماں بوتگ انت –

آوار جنگ بوتگیں مردمانی کھول ءِ گوشگ انت کہ مئے دوستگیں مردم لٹ شاپ کنگ ءُ پدا بیگواہ کنگ بوتگ انت –

دومی نیمگ ءَ چہ کیچ ءِ دمگ مند ءَ پوج ءِ دست ءَ آوار جنگ بوتگیں درمحمد واجو ء وھاب ءُ ھسیم ء شفیع محمد جھمنند گیاب یل بوتگ انت

ھردو مردم گوستگیں ھپتگ ءَ پاکستانی پوج ءِ دست ءَ زورانسری آوار جنی ءَ پد بیگواہ کنگ بوتگ انت کہ گوستگیں روچ یل بوتگ ءُ وتی گِس ءَ سر بوتگ انت –