کوسٹل ھائی وے سر ءَ پوج ءِ سر ءَ بوتگیں بمب تراک ءِ زمّہ واری بی ایل ایف ءَ منّ اتگ

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی افیشل ٹیلی گرام چینل “آشوب” ءَ شنگ کرتگیں درشان ءِ تہ ءَ گوادر ءِ دمگ نلینٹ ءَ پاکستانی پوج ءِ سر ءَ بوتگیں بمب تراک ءِ زمّہ واری منّ اِتگ ءُ گوشتگ کہ اُرش ءَ پاکستانی پوج ءِ یک گاڑی ءِ سرجمی ءَ تباہ بوتگ ءُ اپسرے ءَ ھوار ھشت کارمند مُرتگ انت –

میجر گوھرام بلوچ ءَ اُرش ءِ سرجمیں ھال داتگ ءُ گوشتگ کہ سرمچاراں چین پاکستان اکنامک کوریڈور (سی پیک) دگ ءَ چیرکُتگیں شورھاں گوں پُھل ھما وھد ءَ ریموٹ کنٹرول بمب ءِ نشانگ کتگ کہ پوج ءِ کاروانے گوزگ ءَ بوتگ – بمب اُرش ءَ چہ پوج ءِ گاڈی ءِ سرجم ءَ تباہ بوتگ ءُ پُھل ناکارہ بوتگ، وھدیکہ گاڈی ءَ سواریں اپسرے ءَ ھوار ھشت پوجی کارمند مرتگ انت ءُ سَے سک زدگ بوتگ انت –

جارکش ءِ رِد ءَ مروچی یکشمبے ءِ روچ ءِ ادار یازدہ ءُ نیم ءَ سرمچاراں سی پیک دگ ءَ کوسٹل ہائی وے ءِ سر ءَ نلینٹ ءَ زیرو پوائنٹ ءِ ھند تلاروک کئور ءَ تراکناکیں شورہ کل کتگ – پاکستانی پوج ءِ دو گاڈیاں چہ پُشتی گاڈی چیرکُتگیں شورھانی نشانگ کتگ اُرش ءِ آسر ءَ گاڈی سرجم ءَ تباہ بوتگ ءُ گاڈی ءَ سواریں اپسرے ءَ ھوار ھشت پوجی کارمند مرتگ انت ءُ سَے سک زدگ بوتگ انت وھدیکہ پُھل سرجم ءَ ناکارہ بوتگ چریشی ءَ چہ گوادر ءُ تربت ءَ رؤگ ءُ آھگ ءِ دگ بند بوتگ-

جارکش ءَ گوشتگ کہ بلوچستان لبریشن فرنٹ اے اُرش ءِ زمہ واری ءَ منّ اِیت ءُ سرمچارانی پد ماں پد اُرشاں چہ دژمنیں پوج ءِ ھاٹیگ نزور بوتگ اَنت پمیشکہ آئی ایس پی آر اے اُرشانی راستی چیر دیگ ءَ اِنت دانکہ وتی پروش وارتگیں ءُ بے ھاٹیگیں پوج ءَ ھاٹیگ بہ دنت- اے اُرش ءِ تامر زوت شنگ کنگ بیت –

میجر گوھرام بلوچ ءَ گوشتگ کہ ما اے گپ ءَ تچک کن اِیں کہ ھمے ھنداں دڑامب، نلینٹ ءُ کلانچ ءِ کوھاں شکار ءِ سر ءَ سرجم ءَ بندش جنگ بوتگ، شکاری کڈن کنگ بنت کہ اے ھند ءُ دمگاں مہ رو انت- دژمنیں پوج شکاری ءُ پکنک کنوکانی دروشم ءَ وتی چاروگ ءُ مکبراں سرمچارانی رندگیری ءَ دیم دیگ ءَ اِنت، مھلوک ءَ گوں دزبندی اِنت کہ کوھی دمگانی نیمگ ءَ مہ رو انت –