روکپتی بلوچستان: 63 سالی کماشے ءَ ھوار دو کس بیگواہ

روکپتی بلوچستان ءَ گوستگیں روچ ءَ بیتگیں زھرشانی ءِ وھد ءَ ایرانی چیریں ادارھانی دست ءَ بازیں کساسے ءَ مردم آوار جنگ ءَ پد بیگواہ کنگ بیتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ گوستگیں روچ ءَ بیتگیں زھرشانی ءِ وھد ءَ ایرانی چیریں ادارھاں بازیں مردم آوار جنگ ءَ پد بیگواہ کتگ انت کہ ایشانی توک ءَ چار کسانی پجار گوستگیں شپ ءَ بیتگ انت ءُ دگہ یک کسے ءِ پجار بیتگ-

شنگ بیتگیں تامر بندانی توک ءَ گندگ بیت انت کہ اود ءَ زھرشانی ءِ وھد ءَ ایرانی چیریں ادارہ ءُ پولیس زھرشانی کنوکیں مردماں کشان کنگ ءُ برگ ءَ اَنت-

گوستگیں آوار جنگ بیتگیں مردمانی تہ ءَ یکے ءِ پجار ناصر ریگی ءِ نام ءَ زانگ بیتگ کہ چد ءُ پیسر زکریا کھرزئی، مھمد کوھساری، الیاس براھوئی ءُ نمعت براھوئی ءِ نام دیم ءَ اتکگ ات اَنت-

ھالانی تہ ءَ گوشگ بیتگ کہ گوستگیں روچ ءَ پولیس ءَ زھرشانی کنوکانی سر ءَ انسو گیس جتگ ءُ اود ءَ بازیں مردمے ھمے زھر ءِ سبب ءَ تستگ ءُ نادراہ جاہ ءَ برگ بیتگ اَنت کہ چریشی ءَ اود ءَ ڈاکٹرانی گوشگ اِنت اے مردمانی دپ ءُ دیماں زھریلی گیس آس دیگ بیتگ اَنت-

ھمے وڑ ءَ زاھدان ءَ ھواریں دمگ ھاش ءَ ھم گوستگیں شپ ءَ 63 سالی ئیں کماشے آوار جنگ ءُ بیگواہ کنگ بیتگ-

روکپتی بلوچستان ءِ دمگ ھاش ءَ چیریں ادارھانی کارمنداں ھاجی ریگی ءِ گس ءِ سر ءَ بیڑ برتگ ءُ اود ءَ آوار جتگ ءُ برتگ-

ھالانی تہ ءَ گوشگ بیتگ کہ چیرین ادارہ ھاجی ریگی ءِ زھگ مھسن ءِ آوار جنگ ءَ شتگ انت کہ آ اود ءَ نہ بیتگ چریشی ءَ چہ آئی ءِ پت اش آوار جتگ ءُ برتگ-

مھسن ریگی ماں ھاش ءَ مزنیں مسیت ءِ بانگو ءُ گر ءُ دار کنوک اِنت چہ چریشی ءَ آئی ءِ سر ءَ دزگیری ءِ ھکم اتکگ ءُ آئی ءِ پت ءِ لوگ ءِ سر ءَ بیڑ برتگ ءُ آئی ءِ پت اش آوار جتگ –