پنجاب ءَ بلوچ نودربرانی سر ءَ پد ماں پد اُرش
ٹی بی پی شونگال
بیست ءُ ھپت فروری ءَ قائد اعظم شھدربرجاہ اسلام آباد ءَ پشتون کونسل ءَ بندوکیں نودربرانی مزنیں کساسے ءَ شھدربرجاہ ءَ وانوکیں بلوچ نودربرانی سر ءَ اُرش کُتگ، کہ ایشی ءِ آسر ءَ دہ ءَ گیش بلوچ نودربر ٹپی بیتگ اَنت، کہ ایشانی تہ ءَ بازیں نودربر ناوشیں رنگے ءَ ٹپیگ بیتگ اَنت کہ آیانی بازیں روچاں چہ نادراھجاہ ءَ اِلاج برجاہ اِنت۔
اسلام آباد ءَ بلوچ نودربرانی سر ءَ اے اولی اُرش نہ اِنت بلکیں پنجاب ءِ جتاجتائیں شھدربرجاھانی تہ ءَ وانوکیں بلوچ نودربرانی سر ءَ مزنیں مدتے ءَ چہ پد ماں پد اُرش بیان ءُ پیداک اَنت۔ قائد اعظم شھدربرجاہ اسلام آباد ءِ واکدار ءُ پولیس ءَ بلوچ نودربرانی سر ءَ برجاھیں اُرش ءِ دارگ ءَ پہ ھچ گام نہ زُرتگ ءُ وت ءَ یک کِر کُتگ، ءُ پنجاب شھدربرجاہ لاھور ءِ پھازگی اپسر کرنل عبید ءِ نیمگ ءَ بلوچ نودربرانی سر ءَ اُرش کنگ ءَ پہ دگہ نودربر گلاں زھرناکی دیگ ءَ چہ ھمے آسری زیرگ بیت کنت کہ بلوچ نودربرانی سر ءَ اُرشانی تہ ءَ گمانی دروشم ءَ ڈیھی ادارگ ھوار اَنت ءُ پنجاب ءِ شھدربرجاھانی تہ ءَ بلوچ نودربرانی ھاتر ءَ زمین تَنک کنگ بئیگ ءَ اَنت۔
ھمے وھد ءَ دومی نیمگ ءَ پشتون سروکاں بلوچ نودربرانی سر ءَ بیتگیں اُرش ایر جتگ ءُ دیر چاری ءِ درشان کُتگ ءُ ٹپی بیتگیں نودربرانی ھال پُرسی کنگ ءَ چہ ھمے کلوہ داتگ کہ بلوچ ءُ پشتون راجاں اَے جاورانی تہ ءَ سبر ءُ اوپار ءِ درشان کنگ لوٹ ایت ءُ بلوچ نودربرانی سر ءَ بیتگیں اُرش ءَ نودربرانی جنگ ءَ ابید راجی رنگ دئیگ ءَ پھریز کنگ لوٹ ایت۔
شھدربرجاھانی تہ ءَ نودربر گلانی نیام ءَ جنگ یکشل ءَ بنت بلے بلوچ ءُ پشتون نودربراں دیر چاری ءِ درشان کنگ لوٹ ایت ءُ نودربرانی جنگ ءَ بلوچ ءُ پشتون ڈِکَّر ءِ دروشم دیگ ءَ پھریز کنگ لوٹ ایت۔ بلوچستان ءُ پختونخوا ءَ بلوچ ءُ پشتون راج ڈیھی زوراکی ءِ آماچ اَنت آیاں یکجاھی ءِ درشان کنان ءَ ڈیھی زوراکیانی بگیر ءَ ھواریں جد ءُ جھد کنگ ءِ ھاتر ءَ گام زیرگ ءِ زلورت اِنت۔
دومی نیمگ ءَ بلوچ راج دوستیں تکانی نیمگ ءَ چہ اَے بھتام جنگ بئیگ ءَ اِنت کہ پنجاب ءِ شھدربرجاھانی تہ ءَ بلوچ نودربرانی سر ءَ بیوکیں اُرش، آیاں تنگ کنگ ءُ آیانی زورانسری بیگواھیانی پُشت ءَ گمانی دروشم ءَ ھما چیریں تاکت سر پُر کنگ ءَ اَنت، کہ آ بلوچ نودربرانی سیاسی کرد ءَ چہ ناوش اَنت، پمیشکا آ نودربراں جتاھیں جنجالانی تہ ءَ مانگیشینگ ءِ کوشست کنگ ءَ اَنت۔
پنجاب ءَ بلوچ نودربرانی سر ءَ اُرش، بلوچ ءُ پنجاب ءِ نیام ءَ برجاھیں دگری ءُ دیری ءَ گیشتر ودینگ ءِ سوب جوڑ بیت کُت کنت پمیشکا سرکار ءَ بلوچ نودربرانی پھازگ ءُ رکینگ باوری کنگ لوٹ ایت۔