شال ءِ دگ چونیں ملاراں گپتگ اَنت؟
نبشتہکار : اے بی ریکانی
دی بلوچستان پوسٹ
همُک سُهب من چہ واب ءَ پاد کایاں، گوشی ءَ زور آں، سرهال ءِ چاران ءُ گوشدار آں بلے همُک سرهالانی تہ ءَ شال هوار اِنت۔ همک روچ شال دلبند سر ءَ مات ءُ گوهارانی پریات واہ ءُ زاری شال دلبند ءَ داگ داگ کنگ ءَ اَنت۔ ماما گوں وتی همراهاں شال ءِ دگّانی سر ءَ هونی ئیں ارس گوارگ ءَ اِنت۔ شال ءِ ماهِکانیں سورت سیاه تابیں مُجاں گپت۔ نزاناں کہ شال ءَ اِے سرزا چہ ابرمی رس اتگ یا بنی آدماں داتگ بلے همُک روچ شال ءِ دگانی سر ءَ نوک نوکیں اکس زاهر بنت، همک روچ ماتانی گریوگ ءُ پریات نوک بنت ءُ شال ءَ هوار سرجمیں بلوچستان ءَ جکسین اَنت، بلے بژن کہ سرجمیں بلوچستان واب کپتگیں آدم چہ واب ءَ بُست کُت نہ کنگ ءَ اَنت، اگاں یکے واب ءَ بُست کنت ءُ دومی چو مات ءَ آئی ءِ ٹپور اِیت ءُ واب کپین اِیت۔
اگاں اے واب کپتگیں مردم چہ وتی تُرس ءَ گُنگ بوتگ اَنت بلے بےزمیر وَ نہ بوتگ اَنت! اگاں بے زمیر نہ بوتگ اَنت گُڑا سرجمیں میڈیا ءَ شال ءِ دلبند سر ءِ مات ءُ گوهارانی، کودکیں چُکانی ءُ کماشانی اکس شِنگ اَنت چہ ایشانی گندگ ءَ آیاں زمیر ملامت نہ کنت؟ گند ئے بلوچ یک گیرت مندیں راجے، هر بلوچے پهر بند اِیت کہ آ یک بلوچے ءِ لوگ ءَ پیداگ بوتگ ءُ آئی ءَ بلوچی نامے پر اِنت آ سرمچنڑ ءُ سرمچاریں بلوچانی اوبادگ اِنت، آ میر چاکر ءُ میر گوهرام وڑیں نمیرانی سرانی وارس اِنت ءُ آ پهر بند اِیت آ یک گیرت مندیں بلوچے ءِ پُسگ اِنت۔
گُڑا زاناں اد ءَ زمیر ملامت نہ کنت کہ تو یک گیرت مندیں بلوچے ءِ پُسگے ئے ءُ میر گوهرام ءُ میر چاکر اوبادگ ئے ، همُک روچ پنجابی یے تئی لوگ ءَ دور کنت ءُ تئی برات ءُ گوهاراں زور اِیت ءُ بارت زاندانیگ کنت؟ گُڑا زاناں اِد ءَ گیرت دیم ءَ کیت اِنت یا نہ اِت اِنت؟-
بژنی هبرے کہ ما وت ءَ گیرت مندیں بلوچ گُش ایں ءُ وهدی بلوچانی نام پولنگ کُتگ هر کُجا سر بُرز اِنت سُنٹ ءَ سُنٹو اِنت ءُ تَر اِنت بلے پنجابی یے مئے لوگ ءَ دور کنت مئے برات ءُ گوهاراں جنت ءُ گوں وت بارت بلے ما چہ تُرس ءَ وتی گوهارانی بیگواهی ءِ هلاپ ءَ توار چست کُت نہ کن اِیں، اگاں مئے براتے! برات ءُ گوهارانی زوریں بیگواهی هلاپ ءَ توار چِست کنت گُڑا ما زاناں دیم اوشتوک بہ ایں ءُ زاناں بیگواهی تُرس ءُ بیم ءَ دے ایں ءُ زاناں توکل ءَ دور دے اِنت۔
مرچی بانک ماهل کہ زوریں ریاست کاندهاں آوار جتگ ءُ گوں وت برتگ بلوچ ننگ سر ءَ پولنگ ءِ جتگ اے بلوچستان تہ ءَ نوکیں هبرے نہ انت ءُ ناں پہ پنجابی یے ءَ نوکیں کارے، گِند ئے پنجابی ءَ بلوچاں چہ پیش لکانی کساس ءَ بنگالی زالبول بُرتگ ءُ وتی زنداناں بند کُتگ اَنت ءُ آیانی گوں ما هراب کاری کُتگ ءُ زالبول لاپ پُر کُتگ اَنت پہ همئے چُهد ءَ کہ بنگالی رهشون مئے ایردستی ءَ بہ منّ اَنت ءُ وتواجهی ءِ جُهد ءَ مہ کن اَنت بلے بنگالی راج ءَ وتی آزادی جُهد یل نہ دات ءُ وتی سر ڈگار آجؤ کُت۔ مرچی پنجابی بلوچ ننگاں زندانیگ کنگ ءَ اِنت بلوچ آزاتی جُهد ءِ نزور کنگ جُهد کنگ ءَ اِنت بلے اے پنجابی نزانتکارے کہ بلوچ ننگ زاندانیگ کنگ ءَ بلوچ جُهد تمرد بیت اِنت ءُ دیم ءَ جُنزان بیت۔
بلوچ ءَ گڈی پیسلا کُتگ ءُ گُشتگ کہ مئے جُهد سر ڈگار آزاتی ءِ جُهد اِنت مئے جُهد ابید چہ راجی آزاتی ءَ دیم ءَ هِچ چیز داشت نہ کنت۔ پنجابی وت بہ مار اِیت ءُ بچار اِیت شاری وڑیں گوهار پہ راج ءِ آزاتی ءَ وت ءَ شور ءُ بند اَنت تراکین اَنت، اُستاد اسلم وڑیں راهشون چو ابراهیم ءَ سرڈگار آجوئی ءَ وتی بچ ریهان ءَ شور ءُ بند اِیت ءُ پہ سر ڈگار کُربان کنت گُڑا اے راج جُهد ءَ کُجام جاه نزوری مان اِنت کہ پنجابی جُهد ءَ نزور کُت بہ کنت۔
اگاں مرچی شال ملاراں گپتگ باندا شال چو نوک سوریں بانور ءَ بیت آ روچ دیر نہ انت انشاءاللّه، راج ءُ راج اِستان زوت آجؤ بات اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔