چہ اسپین ءَ آیوکیں دو گوھارانی کوش: پت پندل ءِ ھوار بوگ ءِ شک ءَ دزگیر

پاکستان ءِ اُستان پنجاب ءِ دمگ گجرات ءَ چہ اسپین ءَ آیوکیں دو گوھار عروج عباس ءُ انیسہ عباس ءِ کوش ءِ درگت ءَ اسپین ءَ جھمنندیں آیانی پس وتی دو زھگانی کوش ءِ پندل ءِ شک ءَ دزگیر کنگ بیتگ-

اسپین ءِ دمگی آمیدگس ءَ کھول ءِ پندل ءَ ناگتی دزمانجی ءِ بھتام ءَ پت ءِ دزگیر کنگ ءِ ھکم داتگ-

پولیس ءَ آمیدگس ءَ گوں گوشتگ کپ پٹ ءُ پول ءَ سرپدی بیت اِنت جنکانی پت غلام عباس وتی دو زھگ عروج ءُ انیسہ ءَ رپینگ ءَ دزمانجن اِنت-

اے پندل ءَ آئی ءِ لوٹانی پد ءَ جنک گجرات ءَ یک میتگے ءَ راہ دیگ بیتگ اَنت چریشی ءَ آئی ءَ جنکانی دیم ءَ بھانگ کتگ لھتے روچان پد چہ اسپین ءَ پاکستان ءَ آیگ ءَ اِنت ءُ آئی ءِ مات بیمار اِنت-

آمیدگس ءَ گوں گوشتگ ئے کہ ایشی ءِ مول ءُ مراد ھمے بیتگ اود ءَ وتی مرداں یورپ ءَ بیار اَنت ایشاں چار سال ءَ پیسر نکاہ بیتگ بلے جنکاں اے وڑ کنگ ءَ انکاری کتگ آ اے نکاہ ءَ سدک اش لوٹ اتگ ایشی ءَ پد آیانی ناکو، برات ءُ ناکوزگ ھوار بیتگ ءُ آیانی کوش اش کتگ –

جنکانی پت ءِ دزگیر کنگ ءِ مول ءُ مراد ھمیش اِنت آمیدگس اے راست کنگ ءِ جھد ءَ کنت آیانی پت راستی ءَ کوش ءَ ھوار اِنت یا اے گپ ءَ پیش ءَ سرپد بیتگ یا ناں –

گوستگیں سال ءَ ھم عروج عباس ءُ انیسہ عباس ءِ کوش ءَ پد آیانی پس اسپین پولیس ءَ پٹ ءُ پول ءِ ھاتر ءَ دزگیر کتگ ات –