تربت: ورنا ءِ زورانسری آوار جنی ءِ بگیری ءَ زھرشانی ، شھدگ بند

بلوچستان ءِ دمگ کیچ ءَ پاکستانی پوج ءِ دست ءَ زورانسری آوار جنگ بوتگیں ورنا ءِ بگیری ءَ آئی ءِ کھول ءُ دمگی مردماں زھرشانی کنان ءَ بنجاھی شھدگ بند کتگ –

گیشیں ھالانی رِد ءَ گوستگیں روچاں چہ تربت ءَ پھازگی لشکر ءِ دست ءَ دوبر زورانسری آوار جنگ بوتگیں ورنا زمان بلوچ ءِ کھول ءَ کیچ ءِ دمگ ھوشاپ ءَ شال تاں تربت ءَ رؤکیں بنجاھی شھدگ ءِ سر ءَ زھرشانی کنان ءَ دگ بند کتگ –

شھدگ ءِ بند بوگ ءَ ھردو نیمگاں گاڑیانی لین لگ اِتگ ءُ بازیں مساپر ءِ پنس اِتگ –

زانگ بہ بیت زمان بلوچ دو روچ ساری چہ تربت ءَ پھازگی لشکر ءَ آوار جتگ ءُ گوں وت برتگ کہ پدا ھما انت کہ گار انت – ورنا ءِ زورانسری آوار جنی ءِ بگیری ءِ آئی ءِ کھول ءِ مردماں پریس کانفرنس کنان ءَ گوشتگ کہ زمان ء سپاھان کہ کیچ ءِ دمگ بالگتر ءِ جھمنند انت آ دھ فروری دوھزار بیست ءُ سَے ءَ آدینگ ءِ روچ ءَ چہ تربت ءِ بازار ءَ زورانسری آوار جنگ ءُ بیگواہ کنگ بوتگ دو روچ گوزگ ءَ پد ھم آئی ءِھچ وڈیں ھال اھوال نیست ـ ھمائیں کہ زمان بیگواہ انت آئی ءِ کھول ءِ زند ازاب ءِ تہ ءَ گوزگ ءَ انت ءُ آئی ءِ راہ ءَ چارگ انت –

آھانی گوشگ ات کہ اے اولی رند نہ انت کہ زمان زورانسری آوار جنگ ءُ بیگواہ کنگ بوتگ بلکنہ چدوپیش ھم زمان بلوچ ءُ آئی ءِ برات ماجد بلوچ سال دوھزار بیست ءَ نُھ جون ءَ پھازگی لشکر ءَ آوار جتگ ءُ بیگواہ کتگ انت کہ تاں شش ماہ ءَ لٹ شاپ کُتگ ءُ پدا یل داتگ انت – آھانی گوشگ ات کہ پھازگی لشکر مدامی مئے کھول ءِ سر ءَ زوراکی کنگ ءَ انت کھول ءِ مردماں نشانگ کنگ ءُ زورانسری آوار جنگ ءُ بیگواہ کنگ ءَ انت –

کھول ءِ گوشگ ات کہ زمان بلوچ ءِ زند ءِ درگت ءَ مارا تُرس انت ھمے ھاتر ءَ پھازگی ادارہ انسانی ھمدردی ءِ رِد ءَ زمان ءَ یل بہ کن انت – ما چہ برزی تبک ءُ پھازگی ادارھاں لوٹ کن ایں کہ مئے کھول ءِ سر ءَ وتی زوراکیاں بند بہ کن انت ءُ درسیں زلم زوراکیانی بگیری ءَ گامگیج زورگ بہ بیت اگاں ناں گڈا ما زھرشانی کنگ ءِ ھک ءَ داریں –