منگچر: دھکانکاراں زھرشانی کنان ءَ شال تاں کراچی ءَ رؤکیں شھدگ بند کتگ

بلوچستان ءِ دمگ کلات منگچر ءَ لین ءِ نیستی ءُ بازیں لوڈشیڈنگ ءِ بگیری ءَ دھکانکاراں زھرشانی کنان ءَ شال تاں کراچی ءَ رؤکیں شھدگ بند کتگ –

چریشی ءِ سوب ءَ ھزارانی کچ ءَ مساپر کش ءُ دگہ گاڑی اشتاتگ انت، دگ ءِ ھردو نیمگاں گاڑیانی لین لگ اِتگ –

درنگاز کنوکانی گوشگ ات کہ لین ءِ بازیں لوڈشیڈنگ ءِ سوب ءَ کشار مِرگ ءَ انت – بیست ءُ چار ادارانی میان ءَ بس دو ادار ءَ لین دیگ بژنی گپ یے –

آھانی گوشگ ات کہ کیسکو ءِ زلم ءُ زوراکیاں مارا نادراھ جوڈ کتگ، دو ادارانی لین ءِ بوگ ءَ کشارانی آپ دیگ وتی جاہ ءَ موبائیل ھم چارج نہ زور انت – دھکانکار کیسکو ءِ زلم زوراکیانی سوب ءَ در پہ در بوگ ءَ لاچار بوگ ءَ انت –

آھانی گوشگ ات دگہ مردم ءُ باپاری کنوک ھم چہ اے لوڈشیڈنگ ءَ دلسیاہ انت ءُ بازیں اڈوجنجالانی دیمپان انت – اگاں کیسکو ءَ لین نہ دات گڈا ھر تک ءُ پھناتاں سیادی داروکیں مردم واپڈایے بگیری ءَ پاد کائنت ءُ آئی درسیں زمہ کیسکو ءِ سر ءَ لڈگ بیت –