تربت سول سوسائٹی ءِ چیر دستی ءَ رشیدہ زھری ءُ آئی لوگ واجہ رحیم زھری ءِ زورانسری بیگواھی ءِ بگیر ءَ یک شمبے ءِ روچ ءَ تُربت پریس کلب ءِ دیما زھرشانی کنگ بیتگ کہ اِشی تہءَ سیاسی باسک ءُ چاگردی مردماں مزنیں کچے ءَ بھر زرتگ۔
زھرشانی کنوکاں رشیدہ زھری ءُ آئی لوگ واجہ ءِ زورانسری بیگواھی ءِ بگیرءَ اوگام جتگ ءُ آیانی زیت یل کنائنگ ءِ ھاترءَ مردمی اگبالانی گل ءُ آمید گِس ءَ چہ گامگیج زیرگ ءِ لوٹ کُتگ۔
زھرشانی ءَ تران ءَ تربت سول سوسائٹی ءِ کنوینر گلزار دوست ءَ گُشتگ کہ ڈیھی زوراکی بلوچانی بگیر ءَ برجاہ اِنت بلوچانی آوارجنی ءَ پد زورانسری بیگواھی ءِ آماچ کنت نوں ھمک روچی کسہ ءِ جوڑ بیتگ کہ گوستگیں بازیں دھکاں چہ برجاہ اِنت۔
آئی ءَ گُشتگ کہ گوستگیں شپ ءَ تُربت ءَ ڈاکٹر واحد بخش ءِ لوگے سرءَ بیڑ برگ جنین آدم ءُ زھگاں لٹ شاپی ءِ نشانگ کنگ ءَ گوں بلوچ ننگ ءُ ناموس لگت مال کنگ بیتگ اَنت۔
آئی ءَ گُشتگ کہ ما سرپد بئیں ڈیھی پالیسی بلوچاں وتی سرڈگار ءِ سرءَ زندگی گوازینگ ءَ نئیلگی اِنت بلکینہ ڈیھہ ءَ تھنا بلوچانی ساحل وسائل لوٹ اَنت بلوچ نہ۔
آئی ءَ گُشتگ پیسرءَ بلوچ مردیں آدم زورانسری بیگواھی ءِ آماچ کنگ بیتگ اَنت بلے نوں بلوچ جنین آدم ءُ زھگ ھم چہ بیگواھی ءَ نہ رکیتگ اَنت۔
زھرشانی گوں تران کنان ءَ دگہ ترانکاراں گُشتگ کہ بلوچستان ءَ سیاسی باسک ءُ نودربرانی بیگواھی ءِ درچ یکشل ءَ گوستگیں بازیں سالاں چہ برجاہ اِنت نی اِشی تہءَ گیشی آران ءَ بلوچ جنین آدماں ھم زورانسری بیگواھی ءِ آماچ کنگ ءَ سیاھیں اھد بندات کنگ بیتگ، اے کُرتن بلوچ راجی ننگ ءُ سداں سالاں چہ برجاھیں بلوچ چاگرد ءِ ننگ ءُ شرپ ءِ سرءَ سراسری اُرش اِنت۔
آیاں گُشتگ بلوچ چاگرد ءِ تہءَ زالبولاں اھدی زمانگ ءَ اِزت ءُ شرپ دیگ بیت اِنت بلے نوں لشکری بلوچ دودمان ءِ سرءَ دست مانجنی کنان ءَ چاگرد ءِ حساسیں روایاتانی سرءَ اُرش کار اَنت اِشی بزانت ھمیش اِنت کہ پَزانت چاگردءِ تہءَ زھر ءِ ودی کنگ بئیگ ءَ اِنت۔
آیاں گُشتگ بلوچاں مدام وتی جنین آدم ءُ زھگ پھازتگ اَنت نی ڈیھہ آیاں زورانسری بیگواھی ءِ آماچ کنگ ءَ اِنت ءُ مئے ھستی ءِ جُست اِنت ڈیھی ھستیں پالیسی پہ ڈیھہ ءَ ھچ پئیم ءَ گھتری آرت نہ کنت۔
آیاں گُشتگ کہ لشکری ءُ زمہ واریں ادارگ مردمانی تہءَ زھر ودی کنگ ءَ چہ پھریز بہ کنگ اَنت ورناھاں زور نپرت ءِ نیمگ ءَ دور مہ دی اَنت پرچہ کہ بلوچستان گوستگیں بازیں سالاں چہ لشکری زوراکیانی آماچ اِنت ءُ یک انچیں آس ءِ روک کنگ بیتگ کہ اِشی مرگ ءِ ھچ پئیمیں آثار گندگ ءَ نئیت اِنت۔