بلوچستان ءِ جتاجتائیں دمگ شال، کیچ ءُ ڈیرہ غازی خان جتاجتائیں وئیلانی آسر ءَ ھپت مردم بیران چار ٹپی بیتگ اَنت-
گیشیں ھالانی رِد ءَ شال ءَ شمبے ءِ روچ ءَ جناح دگ ءَ سلیم کمپلیکس ءِ نزیک ءَ ناشناسیں سلاہ بندیں مردمانی تیرگواری ءَ چہ عبداللہ نامیں مردمے بیران ءُ نور احمد، سردار ، بی بی رُکیہ ءُ بی بی زاکرہ ٹپی بیتگ اَنت-
ھمے وڑ تمبو پلیجی ءِ گوٹھ کیا ءَ سلاہ بندیں مردمانی تیرگواری ءَ چہ زالبولے بیران بیتگ، بیران بیتگیں زالبول ءِ پجّار بی بی روبینہ ءِ نام ءَ چہ بیتگ ،دوئیں وئیلانی سوب انگت زانگ نہ بیتگ اَنت-
بلوچستان ءِ دمگ کیچ ءِ شھر تربت ءَ مروچی بیگاہ ءِ وھد ءَ یک مردمے لین ءَ گرگ ءِ آسر ءَ بیران بیتگ، بیران بیتگیں مردم ءِ پجّار کھور ء نور محمد قاسم جھمنند شاپُک نام ءَ چہ بیتگ ، مردمانی رِد ءَ آپ ءِ موٹر بند کنگ وھد ءَ آ لین ءَ گپتگ ءُ بیران بیتگ-
ڈیرہ گازی خان ءَ انڈس شھدگ ءَ ٹرک ءُ کسانیں گاڑی یے ءِ میان ڈک ورگ ءِ آسر ءَ کسانیں گاڑی ءَ سوار پنچ مردم بیران بیتگ اَنت، بیران بیتگیں مردمانی لاش پہ گیشیں چار ءُ ٹپاس کنگ ءِ ھاتر ءَ نادُراھجاہ ءَ برگ بیتگ اَنت-