جوسک ءُ مند ءَ پاکستانی پوجءِ سر ءَ اُرشانی زمہ واری بی ایل ایف ءَ من اتگ اَنت

بلوچستان لبریشن فرنٹ ءِ جارکش میجر گوھرام ءَ رسانکدراں شنگ کُتگیں درشانے تہ ءَ مند ءُ جوسک ءَ پاکستانی لشکریانی سر ءَ بیتگیں اُرشانی زمہ واری زُرتگ اَنت۔

بی ایل ایف ءِ جارکش میجر گھرام بلوچ ءَ پاکستانی پوج ءِ سر ءَ اُرش ءِ زمہ واری ءَ زیران ءَ گُشتگ کہ زیک ھشت فروری ءِ بیگاہ ءِ ادار ھپت ءُ چل ءَ سرمچاراں کیچ ءِ ھنکین جوسک ءَ بستگیں زورگریں گیریں پوج ءِ بنجل ءِ سر ءَ دستی بمب ءَ گوں اُرش کُتگ۔ دستی بمب چیک پوسٹ ءِ تہءَ شُتگ ءُ کپتگ کہ چریشی ءَ یک کارمندءِ ھما دمان ءَ مُرتگ ءُ چیک پوسٹ ءَ ھم تاوان رستگ۔

آئی ءَ گُشتگ کہ اُرش ءَ پد پروش وارتگیں پوجی کارمنداں لس آبادیانی نیمگ ءَ تیرگواری کُتگ۔ اِشی ءَ پد ڈیتھ اسکواڈ ءِ ھندی کارندھاں یک اسپیتیں رنگیں کرولا گاڑیءَ گوں سرمچارانی رندگیری کُتگ، بلے لس آبادی ءِ پھازگی ءَ چاران ءَ سرمچاراں آیانی سرءَ اُرش نہ کُتگ۔ بلے ڈیتھ اسکواڈ ءُ ڈیھی کارندھانی پجار بیتگ۔

آئی ءَ دیمترءَ گُشتگ کہ اے کارندہ استانی ایجنٹانی کرد ءَ پیلو کنگ ءَ اَنت۔ المی ءُ زیت اھوال گرگ ءَ سرپدی رس اتگ کہ ڈیتھ اسکواڈ ءِ کارندھانی گاڑی پیسرءَ چہ چیک پوسٹ ءِ سرءَ جاڑیگ بیتگ۔ اے گاڑی مدام بیگاھانی وھد ءَ ھمے چیک پوسٹ ءِ دپ ءَ اوشتیت۔ پاکستانی پوج ءُ ریاستی ایجنٹ مئے نشانگ ءَ اَنت۔ اِشانی سرءَ اُرش بلوچستان ءِ آجوئی ءَ داں برجاہ مان اَنت۔

جارکش ءَ دیمتر ءَ کیچ ءِ ھنکین مند ءَ ھم پوجی چوکی راکٹانی نشانگ کنگ ءِ زمہ واری من اتگ –

میجر گوھرام بلوچ ءَ گوشتگ ھشت فروری ءِ بیگاہ ءِ ساھت ھپت ءَ سرمچاراں مند ملا چات ءَ پاکستانی پوج ءِ چوکی راکٹانی گون ءَ نشانگ کتگ –

آئی ءَ گوشتگ کہ راکٹانی اُرش ءَ پوج ءَ جانی ءُ مالی تاوانانی دیمپانی کنگ کپتگ-

میجر گوھرام بلوچ ءَ گوشتگ مئے اُرش بلوچستان ءِ آجوئی ءَ داں دشمنیں پوج ءِ سر ءَ برجاہ مان اَنت-