بلوچستان: زورانسری آوار جنگ بوتگیں دو مردم یل بوتگ، دگہ دو آوار جنی ءَ پد بیگواہ

سربوتگیں ھالانی رِد ءَ بلوچستان ءِ دمگ کیچ ءَ پوج ءِ دست ءَ زورانسری آوار جنگ بوتگیں دو مردم یل بوتگ انت وھدیکہ دوشیگیں شپ ءَ دگہ دو مردم زورانسری آوار جنی ءَ پد بیگواہ کنگ بوتگ انت –

گیشیں ھالانی رِد ءَ پاکستانی پوج ءَ دوشی شپ کیچ ءِ دمگ تمپ گومازی بیڑ برتگ زوراکی کنان ءَ دو ورنا زورانسری آوار جتگ ءُ بیگواہ کتگ انت –

اھوالکار ءِ رِد ءَ پاکستانی پوج ءَ دوشی شپ ءِ ادار دو ءَ گسانی سر ءَ بیڑ برتگ ءُ بلال ءِ گپور ءُ عمیر ء داد محمد جھمنند گومازی زورانسری آوار جتگ ءُ گوں وت برتگ انت کہ ھنگت بیگواہ انت –

دومی نیمگ ءَ سالے ءَ پیش پوج ءِ دست ءَ زورانسری آوار جنگ بوتگیں بوتگیں یاسر ء بشیر ءُ پیر جان بلوچ یل بوتگ –

اھوالکار ءِ رِد ءَ یاسر شبیر گوستگیں شپ ءِ ادار نُھ یل بوتگ ءُ وتی گِس ءَ سر بوتگ، یاسر سالے ءَ پیش چہ وتی جند ءِ گِس ءَ سنگانی سر ءَ آوار جنگ ءُ بیگواہ کنگ بوتگ –

ھمے وڈ گوستگیں سال ءَ آوار جنگ بوتگیں پیر جان بلوچ ھم یل بوتگ ءُ وتی گِس ءَ سر بوتگ – ھردو ورنایانی یل بوگ ءِ ھبر آھانی کھول ءَ راست کتگ انت –

زانگ بہ بیت بلوچستان ءَ زورانسری آوار جنی ءَ دیر انت کہ یکشل ءَ برجاہ انت کہ آھانی تہ ءَ کمے مردم یل کنگ بوتگ انت، بیگواھیں مردمانی پانکجنیں گل وائس فار بلوچ مسنگ پرسنز ءِ رِد ءَ بلے دگہ دو ھمینچو آوار جنگ بوتگ انت –

گل ءِ رِد ءَ بلوچستان ءَ ھر تک ءُ پھناتاں سیادی داروکیں بیست ھزار مردم ءَ گیش مردم درکانودی آوار جنگ ءُ بیگواہ کنگ بوتگ انت کہ آھانی تہ ءَ گیشتریں کچ نودر ءُ سیاسی رھشونانی انت –

دومی نیمگ ءَ شال ءَ پریس کلب ءِ دیم ءَ بیگواھیں مردمانی کھولانی گل وائس فار بلوچ مسنگ پرسنز ءِ زھرشانی بنجل برجاہ انت –