چین ءَ سپر کنوکانی سر ءَ میان اُستمان ءِ بندش منگ نہ بیت اِنت – چین

چین ءِ سرکار ءَ وتی ڈیھ ءَ سپر کنوکیں مساپراں جتگیں کورونا بندش رد کتگ-

ھال سرکنوکیں ادارہ اے ایف پی ءِ رد ءَ دگہ ڈیھاں چین ءَ سپر کنوکانی سر ءَ بندش جتگ ءُ چریشی ءَ چین ءِ سرکار ءِ لیکہ دیم ءَ اتکگ اَنت-

چین ءِ وزارت ھارجہ ءِ جارکش ماؤ ننگ ءَ گپ کنان ءَ گوشتگ کہ چین ءَ نشانگ کنگ ءُ لھتے ڈیھاں وتی تہ ءَ پُترگ ءَ ترندی کتگ-

زانگ بہ بیت چین ءَ کورونا وائرس ءِ گیش کپتگیں کیساں پد امریکہ، کینیڈا، جاپان، فرانس ءُ لھتے دگہ ڈیھاں چین ءَ آیوکیں مساپراناں کورونا ءِ ٹیسٹ کنگ ءُ کورونا نہ بوگ ءِ چیزانی دیگ گوشتگ-

چینی جارکش ءَ بندشانی بارو ءَ گپ کنان ءَ گوشتگ کہ اے سائنسی بنچک ءَ نہ اِنت ءُ لھتے گامگیج ھچ رنگ ءَ منگ نہ بنت-

آئی ءَ کڈنی درشان دیان ءَ گوشتگ کہ چین ھم مٹگیری ءَ گامگیج زور ایت-

چین ءِ جارکش ءِ نیمگ ءَ شنگ بیتگیں درشان ءَ پد امریکہ ءَ اے گپ تچک کتگ کہ چین ءِ نیمگ ءَ اتکگیں ڈیٹا راست نہ اَنت ءُ اشی ءِ پلگاریں رنگ کنگ بہ بنت-

امریکہ ءِ وزارت ءِ ھارجہ ءِ جارکش نیڈ پرائس ءَ پریس ءَ گپ کنان ءَ گوشتگ کہ سائنس ءِ بنچک ءَ بندش جتگ اَنت ءُ مساپراناں کورونا ٹیست کنگ ءِ لوٹ اِنت ءُ دراھیں ڈیھ وتی وتی زمہ واریاں پیلو بہ کن اَنت-

زانگ بہ بیت چین ءَ آیوکیں مساپراناں بندش جنگ بیتگ ءُ تر ءُ سواد کنوکاں ابید میان اُستمانی تکاں بندوکیں نودربراں ھم ویزا دیگ ءَ نہ اِنت-