بلوچستان ءَ جتاجتائیں وئیلانی آسر ءَ نُھ مردم بیران ءُ بازینے ٹپی بیتگ اَنت

بلوچستان ءَ جتاجتائیں دمگاں دگ ءُ گیس سلنڈر ترکگ ءِ سبب ءَ نُھ مردم بیران ءُ بازین ئِے ٹپی بیتگ اَنت-

بلوچستان ءِ دمگ لسبیلہ ءَ سلنڈر تراک ءَ پد آس چست بیتگ چریشی ءِ آسر ءَ ٹپّیانی تہ ءَ ھشت مردم بیران بیتگ ءُ بازین ئِے انگت ٹپی اِنت-

پولیس گْوشگ اِنت کہ لسبیلہ ءِ بُنجاھی بیلا بازار ءَ دکان ءِ تہ ءَ سلنڈر پٹکنگ ءِ وھد ءَ ترکّ اِتگ ءُ آس چست بیتگ-

آئی ءَ گْوشتگ کہ آس برانزاں دگہ دکان ھم مانپتاتگ اَنت چریشی ءِ آسر ءَ نزیک ءَ اوشتوکیں درزنانی پرپٹاں سک باز تاوان رس اِتگ-

لسبیلہ ءِ ڈپٹی کمشنر مراد کاسی ءِ گْوشگ اِنت کہ سلنڈر ترکگ ءَ چہ دکان واجہ ءَ ھوار بیست مردم ستکگ ءُ ٹپی بیتگ اَنت ، پولیس ءُ لیویز واکدار زوت نادُراھجاہ ءَ برگ ءِ ھاتر ءَ سر بیتگ اَنت-

بیران بیتگیں مردمانی تہ ءَ حاجی عمر ، برکت رونجھا ، محمد حیات ، محمد اقبال ، ظھور رونجھا، ھدایت اللہ ، محمد یاقوب ءُ محمد یوسف نام ءَ چہ بیتگ اَنت-

سول نادُراھجاہ کراچی ءِ ڈاکٹر روبینہ بشیر ءَ گْوشتگ کہ نادُراھجاہ ءِ برن سینٹر ءَ بیست ٹپی ئیں مردم آرگ بیتگ-

ڈاکٹر روبینہ رِد ءَ بیرانیانی کچ گیش بیت کنت، ٹپی ئیں مردمانی جاور نگیگ اَنت نہ آیانی بدن ھپتاد ءَ چہ نَود در سد سُتکگ اَنت- لسبیلہ ءِ ڈپٹی کمشنر ءَ گْوشتگ کہ تراک ءَ پد سلنڈر دکان ءَ مزنیں کچے ءَ آس چست بیتگ، آس کُشگ ءِ ھاتر ءَ آس کُشوکیں گاڑی لوٹائینتگ اَنت –

دومی نیمگ ءَ پولیس ءِ گْوشگ اِنت کہ وئیل ءِ پٹ ءُ پول برجاہ ءَ اِنت-

ھمے وڑ بلوچستان ءِ دمگ نوشکی ءَ آر سی ڈی شھدگ سر ءَ ڈیڈار ءِ نزیک ءَ ڈبل پک اپ وئیل آماچ بیتگ چریشی ءِ آسر ءَ یک مردمے بیران وھدے کہ دوازدہ ٹپی بیتگ اَنت- ٹپی زوت الاج ھاتر ءَ دمگی نادُراھجاہ ءَ برتگ اَنت-

نادُراھجاہ ءِ واکدار رِد ءَ ٹپّیانی تہ ءَ گیشتر زالبوال ھوار اَنت کہ سالونک زرتگ ءُ مستونگ ءَ روگ ءَ بیتگ اَنت-

بیران بیتگیں مردم ءِ پجّار حاجی علم خان ساسولی ءِ نام ءَ چہ بیتگ- لاش پہ گیشیں چار ءُ ٹپاس ءَ پد کھول ءَ داتگ-

ھمے وَڑ تربت ءِ دمگ ڈنُّک ءُ اورماڑہ ءَ دو جتائیں گاڑی وئیل آسر ءَ ڈرائیور ٹپی بیتگ اَنت – دومی نیمگ ءَ بلیدہ ءِ دمگ الندور ءَ تُرند رؤکیں دوھزار گاڑی ءَ پرپٹ ءَ سواریں مرد ڈکر جتگ ءُ ٹپی کتگ-

زانگ بہ بیت کہ بلوچستان ءَ ھمکروچی بؤکیں دگ وئیلاں بازین ئِے بیران بیت یا کہ زندگی ءَ لنگ ءُ مُنڈ بیت-