ھاران: زورانسری آوار جنی ءِ آماچ بیتگیں سئے مردم یل کنگ بیتگ اَنت

بلوچستان ءِ دمگ ھاران ءَ پاکستانی پوج ءِ دستاں زورانسری آوار جنی ءِ آماچ بیتگیں سئے مردم آجو بیتگ ءُ وتی لوگاں سر بیتگ اَنت-

یل کنگ بیتگینانی تہ ءَ دو برات جعفر بادینی ءُ یوسف بادینی ءَ ھوار اللہ نور ء حسن نور ھوار اِنت- اے مردمانی یل بوگ ءِ گپ بلوچستان نیشنل پارٹی ءِ سروک سردار اختر مینگل ءَ کتگ-

یل کنگ بیتگیں مردم بلوچستان ءِ دمگ ھاران ءَ گْوستگیں ماہ ءَ پاکستانی پوج ءَ زورانسری آوار جتگ اَنت-

زانگ بہ بیت بلوچستان مزن آمید گِس ءِ چیف جسٹس محمد نور مسکانزئی ءِ کوش ءِ کیس سر ءَ چہ ھاران ءَ گوستگیں ماہ ءَ جتائیں وھداں بازیں ورنایے پاکستانی پوج ءِ دست ءَ آوار جنگ بیتگ اَنت- اشانی تہ ءَ سئے برات جعفر بادینی، یوسف بادینی ءُ پرویز بادینی ھم ھوار بیتگ اَنت-

اشی ءَ اَبید پوج ءَ چہ ھاران ءَ یک ورنایے نور اللہ ء حسن نور وھدے چہ شال ءَ جعفر ءُ یوسف ءِ سیاد نوید بادینی ھم ھوار اَنت- جعفر بادینی، یوسف بادینی ءُ اللہ نور یل کنگ بیتگ وھدے کہ آ دگہ مردم انگت پوج ءَ گون اَنت-

ھمے وھد ءَ یلانزئی کھول ءَ چہ عجاب یلانزئی ءُ شفقت یلانزئی ھم جتائیں وھداں آوار جنگ بیتگ اَنت، کہ آ سی ٹی ڈی ءَ محمد نور مسکانزئی کیس ءِ بُنجاھی کُتکار گوشتگ اَنت-

پوج ءِ نیمگ ءَ عجاب یلانزئی ءِ لوگ سر ءَ بازیں رند ءَ بیڑ برگ ءُ برات ءِ بیگواھی ءَ چہ بیزار بیتگ ءُ عجاب ءِ مستریں برات لطف اللہ یلانزئی ءَ لوگ بانک ءَ ھوار وتکشی کتگ- عجاب یلانزئی ءُ شفقت یلانزئی انگت بیگواہ اَنت-