روکپتی بلوچستان: سَے زھگاں ھوار چار کس بیگواہ

سر بیتگیں ھالانی رد ءَ روکپتی بلوچستان ءِ جتا جتائیں جاھاں سَے زھگاں ھوار چار کس ایرانی لشکر ءَ آوار جنگ ءَ پد بیگواہ کرتگ اَنت-

سر بیتگیں ھالانی رد ءَ روکپتی بلوچستان ءِ دمگ میرجاوہ ءَ ایرانی لشکر ءَ سَے زھگ کہ آیانی پجار حسن ارباب زئی ء فیض اللہ، حسن ارباب زئی ء جواد ءُ مھمد ارباب زئی ء وھید ءِ ناماں زانگ بیتگ اَنت کہ میرجاہ ءِ نندوک اَنت-

ھالانی تہ ءَ گوشگ بیتگ کہ ھرسئیں زھگ پوجی چوکی ءِ آس دیگ ءِ بھتام ءَ ایرانی لشکر ءَ دزگیر کرتگ اَنت –

ھمے وڑ ءَ ایرانی پولیس ءَ چہ سراوان ءَ ھم یک مردمے دزگیر کنگ ءَ پد ناشناسیں زنداناں برتگ-

آوار جنگ بیتگیں مردم ءِ پجار عبدالرھمان ملازئی جھمنند سراوان ءِ نام ءَ زانگ بیتگ-

ھالانی تہ ءَ گوشگ بیتگ کہ عبدالرھمان دیم پہ مدرسہ ءَ روگ ءَ بیتگ کہ لس پوشاکی کارندھاں دزگیر کرتگ ءُ گوں وت برتگ-

زانگ بہ بیت چھبار ءَ پولیس ءِ کارمند ابراھیم کوچکزئی ءِ دست ءَ بلوچ جنک ماھو ءِ کمشرپی ءَ پد روکپتی بلوچستان ءَ یک زرمبشتے بنا بیتگ کہ چریشی ءَ چہ بازیں مردمے گرگ ءُ جنگ ءُ زدگ کنگ ھم بیتگ اَنت-

روکپتی بلوچستان ءَ بندات بیتگیں زرمبشت ھمک آدینگ ءِ روچ ءَ زاھدان ءَ پوجی تیرگواری ءَ جنگ بیتگیں مردمانی یات ءَ روانک ءُ زھرشانی کنگ ءَ اَنت چریشی ءَ چہ ایرانی لشکر ءِ سر ءُ مانسرانی توک ءَ گیشی گندگ بیتگ اَنت-