ایرانی لشکر ءَ کرد پاٹی ءِ بنجل ءِ سر ءَ گولہ آس داتگ چریشی ءَ یکے بیران

ایران ءِ پاسداران انکلاب ءِ گوشگ انت کہ گوریچانی عراق ءَ کردانی دمگ ءَ ناشرکاریں ٹولی ءِ اُرش ءِ نشانگ کتگ –

گوریچانی عراق ءِ وت واکیں کرد دمگ ءِ بنجاہ اربیل ءِ نزیک ءَ ایران ءِ نیمگ ءَ آس دیگ بوتگیں گولہ چہ یکے کرد پاٹی ءِ بنجل ءِ سر ءَ کپتگ چریشی ءَ کم چہ کم یک مردمے بیران بوتگ –

کوئے ءِ میئر طارق حیدری ءِ گوشگ انت کہ مروچی بزاں دوشمبے ءَ بوتگیں اُرش ءَ دگہ دھ زدگ بوتگ انت –

ایران ءِ فارس رسانکدر ءِ رِد ءَ اے اُرش ءَ پاسداران ءِ انکلاب دست مان بوتگ، کہ آئی گوشگ ات میزائل ءُ ڈروناں گوں ناشرکار ٹولی نشانگ کنگ بوتگ انت –

آئی آر جی سی ءَ شانزدہ ستمبر ءَ ایرانی کرد زالبول مہسا امینی ءِ کوش ءَ پد گوریچانی عراق ءِ کرد دمگاں ایرانی کرد عسکریت لوٹوکیں اپوزیشن ءِ سر ءَ اُرش بندات کتگ انت –

امینی ءِ مرگ ایران پولیس ءِ دست ءَ دزگیری ءَ پد بوتگ ءُ بازیں ھپتگاں برجاھیں زھرشانیانی سوب جوڈ بوتگ –

ایران ءَ الزام جتگ کہ گوریچانی عراق ءَ کرد عسکریت لوٹوک بدامنی کنگ لوٹ انت-