گوستگیں روچ ءَ مستونگ ءَ کاؤنٹر ٹیرر ازم ڈیپارٹمنٹ (سی ٹی ڈی ) ءِ دروگیں میڑ ءَ جنگ بوتگیں مردمانی تہ ءَ یکے ءَ پجار بوتگ کہ آ پیش ءَ زورانسری آوار جنگ ءُ بیگواہ کنگ بوتگ –
بیگواھیں مردمانی پانکجنیں گل وائس فار بلوچ مسنگ پرسنز ءِ رِد ءَ مستونگ ءِ دمگ کابو ءَ پھازگی لشکر ءَ شش مردمانی کہ دیم پہ دیمی میڑ ءَ جنگ ءِ ٹاہ داتگ آھانی تہ ءَ یکے ءِ پجار چار سالاں پیسر زورانسری آوار جنگ ءُ بیگواہ کنگ بوتگیں عبیداللہ ساتکزئی ء سلطان محمد جھمنند کلی سردار ساتکزئی زڑخو شال ءِ نام ءَ چہ بوتگ کہ آئی ءِ کھول ءَ پجار کُتگ –
زانگ بہ بیت گوستگیں روچ ءَ سی ٹی ڈی ءَ ٹاہ داتگ ات کہ مستونگ ءِ دمگ کابو ءَ دیم پہ دیمی میڑے ءَ پنچ مردم جتگ انت – سی ٹی ڈی ءِ گوشگ ات کہ آھانی سیادی چہ مزھبی سلاہ بندیں گلان انت –
وی بی ایم پی ءِ رِد ءَ میڑ ءَ جنگ بوتگیں مردمانی پجار مشتاق ء عبدالرشید، علی احمد ء تاج محمد، حبیب الرحمن ء عبد الصمد، عبیداللہ ساتکزئی، محمد داود ء شیر محمد، نیاز محمد ء عبدالباری ناماں بوتگ انت –
گل ءِ رِد ءَ عبید اللہ ءُ محمد داؤد ءِ درگت ءَ ھمے گپ مارا سر بوتگ کہ پیش ءَ زورانسری آوار جنگ بوتگ انت بلے آھانی کھولانی نیمگ ءَ تنی وھدی اے ھبر راست کنگ نہ بوتگ –
زانگ بہ بیت سی ٹی ڈی ءَ چدوپیسر ھم بلوچستان ءِ تہ ءَ زورانسری آوار جنگ بوتگیں مردم دروگیں میڑ ءِ نام ءَ کُشتگ انت، چیزے وھد انت بلوچ راجدوست ءُ انسانی ھکانی گل سی ٹی ڈی ءِ سر ءَ ھمے الزام ءَ جنگ ءَ انت کہ گوست ءَ بلوچستان ءِ تہ ءَ ھما کار پاکستان ءِ چیریں ادارھاں کتگ انت مروچاں سی ٹی ڈی کنگ ءَ انت –
چدوپیش ھمے سال ءِ جولائی ماہ ءَ پاکستانی پوج ءَ زیارت ءِ نزیک ءَ بلوچ لبریشن آرمی ءَ سیادی داروکیں نُھ مردمانی دروگیں میڑ ءَ جنگ ءِ ٹاہ داتگ ات بلے پدا رند ءَ آھانی پجار کنگ بوت کہ پیش ءَ زورانسری آوار جنگ بیگواھیں مردم بوتگ انت –
وئیل ءِ بگیری ءَ بیگواھیں مردمانی کھولاں پنجاہ روچاں تاں گورنر کارگس ءِ دیم ءَ نندانک جتگ ءُ نشتگ انت بلے پدا رند ءَ وفاقی وزیر رانا ثناء اللہ ءِ باور کنائینگ ءَ پد آھاں شال ریڈ زون ءَ وتی زھرشانی ھلاس کتگ – کہ کمیٹی ءَ زھرشانی نشتگیں مردم باور کنائینتگ انت کہ زورانسری آوار جنیانی گر ءُ دار ءِ ھاتر ءَ گامگیج زورگ بیت اِنت ءُ بیگواھیں مردم دروگیں میڑ ءَ جنگ نہ بنت –