جنیوا: ھم سنتیں راجانی مردمی اگبالانی کونسل ءِ پنجاہ ءُ یکمی پتر ءِ بیست ءُ نھمی نیاد ءَ تْران کنان بلوچ بلوچ نیشنل مومنٹ ءِ سرکماش ڈاکٹر نسیم ءَ چہ ھم سنتیں راج ءَ لوٹ کرتگ کہ آ بلوچستان ءَ وتی راست پولیں مھیمے دیم بہ دنت۔
ھم سنتیں راج ءِ مردمی اگبالانی کونسل ءِ پنجاہ ءُ یکمی پتر ءِ نیاد ماں جنیوا ءَ 12 ستمبر ءَ گر داں 7 اکتوبر ءَ برجاہ بیتگ۔
ما شمئے دلگوش ءَ ماں بلوچستان ءَ پاکستان ءِ مردمی اگبالانی لپاشگ ءِ نیمگ ءَ پرینگ لوٹ ایں۔
آ اود ءَ زور بیگواھی ءُ چہ آمیدگس ءِ پرمان ءَ ڈن کوش گْوستگیں بازیں سال اِنت کہ ریاست ءِ ھمروچیگیں کردگار جوڑ بیتگ۔بلے انیگیں ماھاں ریاست ءِ نام گیپتگیں بدیں کار ءُ کردانی تہ ءَ گیشی اتکگ۔ھمے سال ءَ داں اگست ءِ ماہ ءَ پاکستانی لشکر ءَ 505 مردم زور بیگواہ کرتگ ءُ 147 مردم کشتگ۔بلوچستان ءِ ھند زیارت ءَ ’ناشرکاری ءِ گر ءُ دار ءِ تک‘ ءَ دروگیں میڑاں 11 مردم کشتگ کہ چہ آیاں 6 کس پجارگ بیتگ کہ زور بیگواھیں مردم بیتگ اَنت۔
لاھور ، پنجاپ ، پاکستان ءَ 100 مردمی کنٹ دست کپتگ ، کہ دنیگت پجارگ نہ بیتگ اَنت بلے باور ھمیش اِنت کہ اے مردمی کنٹ زور بیگواھیں مردمانی بیتگ اَنت۔ اے بارہ ءَ دلجمیں گزارش ھست کہ پاکستانی پھزدار ءُ آئی ءِ مردم کشیں رمباں جنین ءُ چک آوار جتگ۔
چوشکہ بلوچستان ءَ رسانک ءُ مردمی اگبالانی پانکجناں روگ ءَ نہ ھل اَنت پمیشکا آ اود ءِ ناگیگیں جاورانی بارہ ءَ ھچ وڑیں ھال دیم ءَ آیگ ءَ نہ اِنت۔
پاکستان میان استمانی راھبند ءُ مردمی اگبالانی زمہ واریاں بھ منگہ نہ دنت۔ بلوچستان ءَ آئی ءِ کارروائیانی بگیری ءَ زیت دلگوش گْور کنگ لوٹ ایت۔
میاربار المی ءَ آمیدگس ءَ برگ بہ بہ اَنت۔ما چہ ھم سنتیں راج ءَ لوٹ کن ایں کہ ماں بلوچستان ءَ وتی راست پولیں مھیمے دیم بہ دنت کہ آ اود ءَ پاکستان ءِ دست ءَ مردمی اگبالانی لپاشگ ءِ پٹ ءُ پول ءَ بہ کنت-