میان استمان پاکستان ءِ سر ءَ اوست مہ داریت ءُ وتی مشن ءَ بلوچستان ءَ دیم بہ دنت – ماما قدیر

شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی ءَ چار ھزار ءُ شش سد ءُ شست ءُ یک روچ سرجم بوتگ انت، مروچی نیشنل پاٹی ءِ سی سی باسک حاجی محمد نیاز لانگو، عبدالرزاق مری ءُ گوں وتی دگہ ھمراھاں بنجل ءَ اتکگ انت ءُ بیگواھیں مردمانی کھول ءِ گوم ءَ دلپدری درشان اِتگ –

بنجل ءَ اتکگیں ٹولی ءِ گون ءَ تران کنان ءَ ماما قدیر بلوچ ءِ گوشگ ات کہ اقوام متحدہ ءَ زورانسری آوار جنی ءِ درگت ءَ بازیں کرارداد ءِ پاس بوتگ ءُ زورانسری آوار جنی انسانی ھک ءُ کانودانی بگیری ءِ سنگینیں جرمے گوشگ بوتگ- زورانسری آوار جنی اقوام متحدہ چارٹر ءَ در انت ءُ انسانی ھکانی بگیری دارگ انت –

ماما قدیر بلوچ ءَ گوشتگ کہ پاکستان دنیا ءَ بلیک میل کنگ ءُ وتی زوراکیاں گوں بلوچانی چک چینی ءَ دلگوش انت، بلوچستان ءَ ھمک روچ چیریں ادارہ بلوچ پرزنداں آوار جنگ ءُ وتی زندانانی تہ ءَ بندیگ کنگ انت، آھانی سر ءَ لٹ ءُ کٹ شھید کنگ ءَ پد آھانی ژانگولیں جوناں چگل دیگ ءَ انت –

ماما قدیر بلوچ ءِ رِد ءَ سال دوھزار یک ءَ بگر تاں روچ ء مروچی ھزارانی کچ ءَ بلوچ پاکستانی ادارھاں سرے بازار، وتی گسانی تہ ءَ مساپر کشیں گاڑی ءُ شھدربرجاھانی تہ ءَ آوار جتگ ءُ بیگواہ کتگ انت – اے بیگواھیں مردمانی تہ ءَ زھگ ءُ زالبول ھم ھوار انت –

ماما قدیر بلوچ ءَ گوشتگ کہ اقوام متحدہ ءِ انسانی ھکانی کمیشن ءِ ادارہ پاکستان ءِ بگیری ءَ ھچ وڈیں گامگیج زورگ ءَ نہ انت بس بژن ءُ دلپدردی درشان دنت، زورانسری آوار جنگ بوتگیں بلوچ پرزندانی کھولاں چاردہ سال انت کہ شدکشیں زھرشانی بنجل ءَ نشتگ انت کہ وت اقوام متحدہ چارٹر ءَدر انت –

ماما قدیر بلوچ ءَ گوشتگ کہ اقوام متحدہ ھک ءُ دل راستی ءِ پٹگے جھد انت گڈا پاکستان ءِ پروپکنڈھاں گوش مہ داریت ءُ وت بہ ایت تچکی ءَ گوں بیگواھیں بلوچانی کھول ءُ بلوچ راج ءِ راستیگیں نمائندگاں دچار بہ کپ ایت –

ماما قدیر بلوچ ءَ گوشتگ کہ ھنگت اقوام متحدہ چماں بند کنت ءُ پاکستان ءِ دروگیں پروپکنڈھانی سر ءَ بروسہ کنت ءُ پککستان ءِ بگیری ءَ ھچ وڈیں گامگیج نہ زوریت گڈا پاکستان ھمیشی ءَ چہ پائدگ چست کنت ءُ بلوچستان ءِ تہ ءَ وتی انسانی ھکانی لگتمالیانی تہ ءَ گیشی کاریت کہ چریشی ءَ یک بلاھیں انسان نیستی ءِ ودی بیت اِنت ءُ انسان نیستی ءِ اے درسیں زمہ دار پدا اقوام متحدہ انسانی ھکانی میان استمانی ادارھانی سر ءَ لڈگ بنت –