بیگواھیں بلوچانی یل کنائینگ ءِ زھرشانی بنجل ءَ چار ھزار ءُ ھپسد ءُ چِل ءُ ھشت روچ سرجم بوتگ انت

بلوچستان ءِ بنجاھی شھر شال ءَ بیگواھیں مردمانی پنکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ چِل ءُ ھشت روچ سرجم بوتگ انت، مروچی بی ایس او مینگل ءِ انفارمیشن سیکٹری بالاچ قادر، شوکت بلوچ ءُ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ تاکتور ءُ زورگیر نزوریں استان ءِ سر ءَ وتی زورگیری ءِ برجاہ دارگے ھاتر ءَ وڈ وڈا کن انت- آ ایردستیں راجانی نفسیات ءَ وان انت ءُ وتی وڈا زوراکیاں برجاہ داران کن انت –

آئی ءَ گوشتگ کہ بلوچستان ءِ تہ ءَ ریاستی ناشرکاریانی تہ ءَ گیشی اتکگ، بازیں ھند ءُ دمگاں پوج ءَوتی دمگی دلارانی کمک ءَ وتی زوراکی ءُ زورانسری درچ یکشل ءَ برجاہ داشتگ انت –

آئی ءَ گوشتگ کہ پاکستانی ریاست ءَ میاں استمانی انسانی ھکانی کانود لگتمال کتگ انت بلے آئی ءَ جست پُرس کنوک نیست- انسانی ھکانی گلانی درشان بس کاگزی جوڑ بوتگ انت – انسانی ھکانی درگت بلوچستان بلیک ھول جوڑ بوان انت استمانی ءُ میان استمانی رسانکدر بلیک آؤٹ انت درساں وتی چم بستگ انت –

ماما قدیر بلوچ ءَ گوشتگ کہ انسانی ھکانی ادارھانی نیمگ ءَ گامگیج زورگ ءُ جار جنگ ءَ ابید ھم ناکہ انسانی ھکانی بگیری دارگ ءَ کمی اتکگ ناکہ آئی ءِ سرا گامگیج زورگ بوگ انت-