گوادر ءِ جھمنندیں ورنا چہ کراچی ءَ بیگواہ

چہ کراچی ءَ پاکستان ءِ پھازگی لشکر ءَ بلوچ ورنایے زورانسری آوار جتگ بیگواہ کتگ –

سربوتگیں ھالانی رِد ءَ دو روچ ساری پوج ءَ کراچی ءِ دمگ لیاری سرگوات کلری ءَ گِس ءِ سر ءَ بیڑ برتگ ءُ خدابخش ء ڈاکٹر عبدالغفور نامی ورنایے زورانسری آوار جتگ ءُ گوں وت برتگ –

اے وئیل دوشمبے ءِ شپ ءَ بوتگ کہ تنی وھدی ورنا دیم ءَ آرگ نہ بوتگ –

دمگی اھوالکار ءِ رِد ءَ پوج ءِ دست ءَ آوار جنگ بوتگیں ورنا خدابخش بلوچستان ءِ تیاب دپی دمگ گوادر ءِ نندوک انت ءُ آ یک آرٹسٹ یے – خدابخش ءِ کھول ءِ رِد ءَ آ پہ ارزی نبشتہ کنائینگ ءَ پولیس تانہ ءَ شُتگ انت بلے پولیس ءَ ارزی نبشتہ کنگ ءَ مکن کتگ –

زانگ بہ بیت کراچی، بلوچستان ءَ ھوار پاکستان ءِ دگہ دمگاں زورانسری آوار جنی ءِ ھال ھمک روچ آھگ ءَ انت ھمے ھپتگ آدینگ ءِ روچ ءَ کراچی ادبی اردو بازار ءَ پولیس ءُ لس پوشاک گوریں مردماں الم ءُ ادب شنگکار منیجر فہیم بلوچ آوار جتگ ءُ گوں وت برتگ کہ ھنگت گار انت ھمے سال ءَ اپریل ءِ ماہ بگر تاں اگست ءَ سَے سد بلوچ زورانسری آوار جنگ ءُ بیگواہ کنگ بوتگ انت –

زورانسری آوار جنگ بوتگیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ سرکماش نصراللہ بلوچ ءِ رِد ءَ زورانسری آوار جنیانی درچ یکشل ءَ برجاہ انت ھمے سال ءَ اپریل ءِ ماہ کراچی شھدربرجاہ ءَ تراک پد زورانسری آوار جنیانی تہ ءَ گیشی اتکگ –

نصراللہ بلوچ ءِ رد ءَ اپریل ءَ بگر تاں مروچی کساس سَے سد مردم زورانسری آوار جنگ بوتگ انت کہ آھانی تہ ءَ گیشتریں کچ کراچی ءِ نندوکیں بلوچانی انت –