زورانسری آوار جنیانی بگیری ءَ ھزدار ءَ زھرشانی ءُروانک

زورانسری آوارجنیانی میان استمانی روچ ءِ درگت ءَ مروچی بلوچستان ءِ جتا جتائیں جاھاں مراگش برجم دارگ بوتگ انت –

زورانسری آوار جنیانی بگیری ءَ مروچی ھزدار ءَ بیگواھیں آصف ءُ رشید بلوچ ءِ کھولانی نیمگ ءَ روانک ءِ کشگ بوتگ کہ اودا بیگواھیں مردمانی کھولاں ھوار سیاسی ءُ چاگردی ءُ ھرتک ءُ پھناتاں سیادی داروکیں مردماں بھر زرتگ –

درنگاز کنوکانی دست ءَ پلے کارڈ بوتگ انت ءُ آھان بیگواھیں مردمانی یل کنائینگے ھاتر ءَ نارہ ھم جتگ –

زھرشانی روانک شھید رزاق چار راہ ءَ بندات بوتگ تاں ڈسٹرکٹ کورٹ دیم ءَ ھلاس بوتگ ءُ ھمودا مچی دروشم مردم یکجاہ بوتگ انت مردماں وتی ھیال درشان اتگ انت –

درنگاز کنوکاں وتی ھیال درشان کنان ءَ گوشت کہ دنیایے تہ ءَ پھازگی لشکر مردمانی جان ءُ مال ءَ پھازیت بلے ادا پھریز ءِ نام ءَ ھمے پھازگی لشکر مردماں کُش انت ءُ مردماں آوار جن انت ءُ سالاں سال وتی بندیگ جاھاں بند کن انت –

آھانی گوشگ ات کہ ھما اولی روچ ءَ اے ریاست ءِ شوربندی بوتگ کہ بلوچانی سر ءَ تاکت کارمرز کنگ بہ بیت آھانی بنکی ھک لگتمال کنگ بہ بنت ھمے شوربندی ءِ رِد ءَ مردم آوار جنگ ءُ بیگواہ کنگ بوگ ءَ انت یا تو وتی زندانانی تہ ءَ آھاں شھید کنگ ءُ آھاں ژانگولیں جوناں ویرانگ ءُ جنگلاں چگل دیگ ءَ انت –

ترانکارانی گوشگ ات کہ بلوچستان ءَ بازیں لوگبانک ءِ اے ھم نہ زانت کہ من وت ءَ جنوزام ءِ بہ گوش آں یا بیگواھیں لوگواجہ ءِ لوگبانک – آ ھچ نہ زان انت کہ آھانی لوگواجہ زندگ انت یاکہ کُشگ بوتگ انت ءُ آھانی جون چیریں جاھے ءَ کل کنگ بوتگ انت –

آھانی گوشگ ات کہ اگاں کسے ءَ ردی ءِ کُتگ گڈا اے ملک ءِ تہ ءَ آمیدگس ھست انت آ آمیدگساں آرگ بہ بنت آھاں وتی کانود ءُ رھبندانی رِد ءَ سزا بہ دئینت اے وڈ مردمانی زورانسری آوار جنگ ءُ بیگواھ کنگ وت وتی کانودانی بگیری ءَ دارگ ءَ انت -.

آھانی گوشگ ات کہ ھمے تاکت ءِ نشہ ءَ شما روکپتی پاکستان بہ با داتگ مروچی بنگلہ دیش جوڈ بوتگ ھمے شوربندی بلوچستان ءِ تہ ءَ بہ بنت مروچی کمے کساس ءَ مردم زوراکی ءِ بگیری ءَ در اتکگ انت باند ءَ اے اشکر برانز گرانت ءُ شمار ءَ ھم سوچ انت –

ھمے وھد ءَ بیگواھیں آصف ءُ رشید ءِ گھار سائرہ بلوچ ءَ گوشتگ کہ منی براتاں چار سال سرجم انت کہ بیگواہ انت – من آمیدگس ءُ کمیشنانی چکر جنگ ءَ دمبرتگ بلے مناں انساپ نہ رستگ اے کمیشن بلکنہ ھمے واست ءَ جوڈ کنگ بوتگ انت کہ بیگواھیں مردمانی کھولانی ٹپانی سر ءَ واد پر بہ ریچ انت – مروچی من وتی وانگ ءُ وتی زند ءِ سرجمیں کار یل داتگ انت ءُ برے شال ءُ برے ھزدار برے برے اسلام آباد ءَ وتی دوستیگیں مردمانی یل کنائینگے ھاتر ءَ پہ زھرشانی ءَ لاچار انت وھدیکہ مئے سرجمیں کھول ءِ زند ھمے ازاب ءِ تہ ءَ گوزگ انت –