لالا فہیم ءِ زورانسری آوار جنی ءِ سی سی ٹی وی تامر ترامجاھاں شنگ بوتگ

کراچی ءِ دمگ اردو بازار ءَ الم ءُ ادب پبلشرز ءِ منیجر لالا فہیم بلوچ ءِ زورانسری آوار جنی ءِ وھدے سی سی ٹی وی تامر چاگردی ترامجاھاں مروچیشمبے ءِ روچ ءَ شنگ بوتگ-

تامر ءِ تہ ءَ گندگ بیت کہ گوستگیں روچ ءَ بزاں آدینگ ءِ روچ ءَ کانود برجاہ داروکیں ادارھانی کارمنداں الم ءُ ادب پبلشرز ءِ منیجر لالا فہیم بلوچ ءَگوں وت برگ ءَ اَنت- تامر ءِ تہءَ زاھر اِنت کہ لس مردمی پوشاک گوریں کارمند آئی ءَ چہ الم ءُ ادب ءِ کارگس ءَ در کنگ ءُ برگ ءَ اَنت-

تامر ءِ تہ ءَ لالا فہیم ءَ جست کن اَنت ءُ پدا آئی ءِ دکان ءَ بند کنائین اَنت پولیس گاڑی ءِ سر ءَ گوں وت بر اَنت- 

چہ اے تامر ءَ پدر اِنت کہ آھاں لالا فہیم ءِ آوار جنی ءَ سندھ پولیس ءِ کمک گون بوتگ-

 الم ءُ ادب پبلشرز پاکستان ءِ تہ ءَ یک نامداریں شنگ کاری ءِ کارگس یے کہ اود ءَ بلوچی ادب ءُ دگہ زبانانی پٹ ءُ پولی کتاب شنگ کنگ بنت اِنت-

شمبے ءِ روچ ءَ لالا فہیم ءِ کھول ءِ مردم پریڈی پولیس تھانہ ءَ آئی ءِ زورانسری آوارجنی ءِ ارزی نبشتہ کنائینگ ءَ شُتگ اَنت بلے پولیس ءَ ارزینبشتہ کنگ ءَ مکن کُتگ بلے لالا فہیم ءِ مردماں آئی زورانسری آوار جنی ءَ دزبندی پولیس ءَ داتگ-

زانگ بہ بیت لالا فہیم بلوچ انسانی حقانی گل ہیومن رائٹس کمیشن آف پاکستان ءِ باسک اِنت-

لالا فہیم ءِ آوار جنی ءَ بلوچ ادیب، زانتکار شائر سک باز دلپدرد اَنت ءُ آ لالا فہیم ءِ زوتاں زوت یل کنگ ءِ لوٹ ءَ کنگ ءَ اَنت-